ტელეკომპანია „მაესტროს“ გენერალური დირექტორობიდან გადაყენებული ბაია გადაბაძე აცხადებს, რომ მიმართავს პროტესტის უკიდურეს ფორმას- გაფიცვას. იგი ასევე მიმართავს საჯარო რეესტრს - არ დაარეგისტრირონ ლევან გაჩეჩილაძე არხის გენერალურ დირექტორად.
„ეს გადაწყვეტილება არის პოლიტიკურად მოტივირებული, მე არ მჯერა იმის, რომ ბიზნესმენ ირაკლი რუხაძეს უნდა „მაესტროს“ აღორძინება, მე არ მჯერა ფულის წარმომავლობის კეთილშობილების. მივიღე შეთავაზება გია და ლევან გაჩეჩილაძეებისგან, რომ დავრჩე ამ არხზე, მაგრამ თუ მე არ მექნა ბერკეტი, რომ გავაკონტროლო სარედაქციო პოლიტიკა, მაშინ ჩემ აქ დარჩენას ყველანაირი აზრი ეკარგება. ამიტომ, მივმართავ იმ უკიდურეს ფორმას, რაც არ მინდოდა - ვიფიცები, მივიდვარ საჯარო რეესტრში რომ დავაფიქსირო ეს ჩემი პოზიცია, ლევან გაჩეჩილაძემ დააყენა საკითხი, რომ მას სურს „მაესტროს“ დირექტორობა, მოვუწოდებ იუსტიციის სამინისტროს და საჯარო რეესტრს - არ დაარეგისტრირონ ეს გადაწყვეტილება იმიტომ, რომ ამით საფრთხეში დადგება ტელეკომპანიის ბედი”, - განაცხადა ჟურნალისტებთან გადაბაძემ.
მისივე განმარტებით, ,,გაფიცვა ნიშნავს იმას, რომ უკანონო იქნება ყველა გადაწყვეტილება, ვინც ჩემ შემდეგ მაესტროს გენერალურ დირექტორად დარეგისტრირდება“.
მისივე თქმით, „მაესტროს“ დღეს მთავრობის დახმარება სჭირდება.
ცნობისათვის, ტელეკომპანია „მაესტროს“ საკონტროლო პაკეტის მფლობელი გიორგი გაჩეჩილაძე გახდა. მან ტელეკომპანიის 55%-იანი წილი შეიძინა. დღეს მაესტროს" პარტნიორთა კრებამ ბაია გადაბაძე დირექტორის პოსტიდან მოხსნა და მის მოვალეობას ლევან გაჩეჩილაძე შეასრულებს.
