საბურთალოს რაიონის გამგებელი ბექა მიქაუტაძე და გამგებლის მოადგილე გაიოზ ვასაძე ამავე რაიონში მდებარე მუნიციპალურ სპორტკომპლექს „ტონუსის“ სერვისებს გაეცნენ. სპორტკომპლექსის საცურაო აუზზე საბურთალოს რაიონში მცხოვრები სოციალურად დაუცველი ოჯახებიდან 200 ბავშვი დადის, სადაც ისინი ცურვას სწავლობენ. გამოცდილი და წარმატებული ქართველი მწვრთნელები მათ წყალბურთშიც ავარჯიშებენ.
გამგებელს აუზზე ხელმძღვანელებთან ერთად ბავშვების მშობლებიც შეხვდნენ. მათ მადლობა გადაუხადეს იმ მომსახურებისათვის, რომელსაც ისინი მერიის სოციალური პროგრამით იღებდნენ და განაცხადეს, რომ მათთვის შეუძლებელი იქნებოდა ეტარებინათ შვილები ცურვაზე ამ დახმარების გარეშე.
საბურთალოს რაიონის გამგებელი ბექა მიქაუტაძე და კომპლექსის მენეჯერი ნოდარ რაფავა შეთანხმდნენ, რომ გამგეობის სპორტული ღონისძიებების ფარგლებში ერთობლივ ტურნირებს ჩაატარებდნენ.
„სპორტკომპლექს „ტონუსის“ სერვისებით აღფრთოვანებული დავრჩი და რაც მთავარია, მერიის დამსახურებით, ეს ყველაფერი ხელმისაწვდომია არა მხოლოდ იმათთვის, ვისაც თანხის გადახდა შეუძლია, არამედ სოციალურად დაუცველი ოჯახებისთვისაც. ორასი ბავშვი ასეთი ოჯახებიდან აქ ცურვას სწავლობს და ჯანსაღი ცხოვრების წესს ეუფლება. მადლობას ვუხდი სპორტკომპლექსის ადმინისტრაციას იმისათვის, რომ აქ საუკეთესო პირობებია შექმნილი როგორც ბავშვებისათვის, ისე უფროსებისთვის. დღეს ჩვენ შევთანხმდით, რომ ერთობლივი ძალისხმევით ჩავატარებთ ტურნირებს საბურთალოზე მცხოვრები ახალგაზრდებისათვის,“ - განაცხადა ბექა მიქაუტაძემ.
სპორტკომპლექსი „ტონუსი“ ბალანჩივაძის N2-ში მდებარეობს. აქ დაცულია ჰიგიენური ნორმები, კომპლექსი აღჭურვილია თანამედროვე აპარატურითა და მოწყობილობებით. კომპლექსი მომხმარებელს სთავაზობს ჯანსაღი ცხოვრებისათვის საჭირო ყველა მომსახურებას.
