თბილისის მერიაში ტრანსპორტის საქალაქო სამსახურის ანგარიშის პრეზენტაცია გაიმართა. როგორც შეხვედრაზე თბილისის ვიცე-მერმა, ლაშა აბაშიძემ განაცხადა, მიმდინარე წელს ტრანსპორტის სფეროში დედაქალაქში რამდენიმე მნიშვნელოვანი პროექტის განხორციელება იგეგმება.
„9 მარტს დასრულდება ტენდერი, რომელიც 175 ახალი ევროპული სტანდარტების ავტობუსის შემოყვანას ითვალისწინებს. ახალი ავტობუსები თბილისში მიმდინარე წლის აგვისტოში შემოვა და ქალაქს თანამედროვე ახალი მუნიციპალური ტრანსპორტი ეყოლება“, - განაცხადა ლაშა აბაშიძემ. თბილისის ვიცე-მერის განცხადებით, დაგეგმილია ასევე ახალი ავტობაზის მშენებლობა, რომელიც ახალ ავტობუსებს მოემსახურება.
დღევანდელ შეხვედრაზე სამსახურის უფროსმა, გიორგი გურგენიძემ დედაქალაქის მთავრობის წევრებს და სფეროს სპეციალისტებს გაწეული სამუშაოების და სამომავლო გეგმების შესახებ ინფორმაცია გააცნო. გიორგი გურგენიძის განცხადებით, მიმდინარე წელს იგეგმება ასევე 7 მეტროსადგურის რეაბილიტაცია და მოძრავი შემადგენლობის მოდერნიზაცია. გარდა ამისა, ივლისში იგეგმება კუს ტბის საბაგიროს გახსნა.
