თბილისის მერმა დავით ნარმანიამ, ვიცე-მერ ლაშა აბაშიძესთან, მერის მოადგილე გიორგი ლილუაშვილთან და კეთილმოწყობის საქალაქო სამსახურის უფროს გივი კუბლაშვილთან ერთად, გულიას სახელობის ხიდზე მიმდინარე სარეაბილიტაციო სამუშაოები დაათვალიერა.
აღნიშნული ხიდის ავარიულობა იქ არსებულმა დაზიანებულმა საკომუნიკაციო ქსელმა გამოიწვია. დაზიანებულია ცენტრალური საკანალიზაციო და სასმელი წყლის მილები, გამოჟონილი წყალი კი ხიდის ძირითად კონსტრუქციას, ბურჯებს, სავალ ნაწილსა და ტროტუარს აზიანებს.
გულიას სახელობის ხიდის რეაბილიტაციის ფარგლებში გამოიცვლება ხიდში გამავალი საკომუნიკაციო ქსელი - წყლისა და საკანალიზაციო მილები. შეიცვლება ჰიდროიზოლაცია, აღდგება სანიაღვრე ქსელი და სადეფორმაციო ნაკერები. ძირითადი სარეკონსტრუქციო სამუშაოების დასრულების შემდეგ კი დაიგება ასფალტის ახალი საფარი, როგორც სავალ ნაწილზე, ასევე ტროტუარებზე.
„სამუშაოები ითვალისწინებს მთლიანად ხიდის მოდერნიზაციას და მიწისქვეშა კომუნიკაციების გამოცვლას. ისე, რომ მინიმუმ 25-30 წლის განმავლობაში ამ ხიდს არაფერი დასჭირდება. სრულად ხდება ხიდის ზედაპირის მოხსნა, კომუნიკაციების გამოცვლა, შემდგომ მოხდება მისი ჰიდროიზოლაცია და გადაეგება გზის საფარი“,- განაცხადა თბილისის მერმა დავით ნარმანიამ.
ხიდის სარეაბილიტაციო სამუშაოებს, თბილისის მერიის კეთილმოწყობის საქალაქო სამსახურის დაკვეთით, კომპანია „ენ სი სი“ აწარმოებს. რეაბილიტაცია 2016 წლის 17 იანვარს დაიწყო და მიმდინარე წლის 17 ივნისს დასრულდება.
სარემონტო სამუშაოებზე დედაქალაქის ბიუჯეტიდან 1 089 000 ლარი დაიხარჯება.