29 იანვარს, 12:00 საათზე, ქ.თბილისის მერიის ა(ა)იპ „სამართლებრივი დახმარებისა და საზოგადოებრივი ჩართულობის მუნიციპალური ცენტრის“ პროექტი „იურიდიული კლინიკა - ჩემი ადვოკატი“ საქართველოს ტექნიკური უნივერსიტეტის სამართლის სკოლასთან ურთიერთთანამშრომლობის მემორანდუმს გააფორმებს. მემორანდუმის ფარგლებში ტექნიკური უნივერსიტეტის სამართლის ფაკულტეტის სტუდენტები, სამოქალაქო და ადმინისტრაციულ სამართალში პრაქტიკულ კურსს გაივლიან იურიდიულ კლინიკაში - „ჩემი ადვოკატი“. სტუდენტები მოქალაქეებს ორგანიზაციის ტრენერ-ადვოკატების ზედამხედველობით სამართლებრივ დახმარებას გაუწევენ. პრაქტიკული კურსი 4 თვეს მოიცავს და ამ ხნის განმავლობაში სტუდენტები სამართლებრივ დოკუმენტებს (სარჩელი, საჩივარი, შესაგებელი და სხვ.) შედგენენ, ასევე ტრენერ-ადვოკატთან ერთად, როგორც სასამართლო, ისე თვითმმართველობის ორგანოებში წარმომადგენლობას განახორციელებენ. კურსის მიზანია, საბაკალავრო და სამაგისტრო კურსის სტუდენტს საშუალება მისცეს, სამოქალაქო და ადმინისტრაციულ სამართალში მიღებული თეორიული ცოდნა პრაქტიკაში გამოიყენოს, გამოუმუშაოს სამართლებრივი პრობლემების დამოუკიდებლად გადაჭრისა და ადმინისტრირების უნარი. დამოუკიდებელი მუშაობის ფარგლებში სტუდენტი განახორციელებს სამართლებრივი ბაზისა და სასამართლო პრაქტიკის მოძიებასა და ანალიზს. შეგახსენებთ, რომ თბილისის მერიის არასამეწარმეო (არაკომერციული) იურიდიული პირის „სამართლებრივი დახმარებისა და საზოგადოებრივი ჩართულობის მუნიციპალური ცენტრის მთავარი მიზანი საქართველოს მოქალაქეებისათვის სამოქალაქო და ადმინისტრაციულ სამართალში უფასო იურიდიული დახმარების გაწევაა.
