თბილისში, პარლამენტის შენობასთან მიმდინარე აქციაზე, სადაც საგზაო მოძრაობის წესებში შესატან ცვლილებებს აპროტესტებენ, ინციდენტი მოხდა.
კერძოდ, აქციაზე შეხლა-შემოხლა მოჰყვა საპარლამენტო უმრავლესობის დეპუტატის თამაზ მეჭიაურის გამოჩენას, როცა აქციის მონაწილეებმა სტვენა დაიწყეს. აქციის ერთ-ერთი მონაწილე ამტკიცებს, რომ დეპუტატმა მას სახეში ხელი გაარტყა.
საპროტესტო აქცია ინციდენტის შემდეგ ისევ გრძელდება. პარლამენტთან შეკრებილი არიან მარჯვენასაჭიანი ავტომობილის მძღოლები, ავტოდილერები და არასამთავრობო ორგანიზაციები.
მათ სამი მოთხოვნა აქვთ. კერძოდ, მარჯვენასაჭიანი ავტომობილების რეგისტრაციის აკრძალვის საკითხი გაუქმდეს. ასევე შეიცვალოს განბაჟების სისტემა, რომელიც წარმოდგენილი არის პარლამენტში კანონპროექტის სახით, რადგან ის მათთვის მიუღებელია. აქციის მონაწილეები მოითხოვენ ასევე 100-ქულიანი სისტემის ამოქმედების გადავადებას, რადგან მოქალაქეების ინფორმირებულობა ამ საკითხზე ნაკლებია.