დიასპორის საკითხებში საქართველოს სახელმწიფო მინისტრი, გელა დუმბაძე სამუშაო ვიზიტით საფრანგეთის რესპუბლიკაში იმყოფება. პარიზში, საქართველოს საელჩოს შენობაში გაიმართა ლევილის შატოსა და მამულის სადიაგნოსტიკო სამუშაოებისა და მამულის მომავალი ფუნქციონირების განსაზღვრის მიზნით შექმნილი არქიტექტურული მისიის მიერ მომზადებული ანგარიშის პრეზენტაცია. მისიას ხელმძღვანელობს ვერსალის არქიტექტურული სკოლის პროფესორი, არქიტექტორი რიშარ საბატიე. მასთან ერთად პროექტის წარდგენაში მონაწილეობდნენ გუნდის სხვა წევრები, რომელთა შორის საერთაშორისო დონის ექსპერტები, პეიზაჟისტები და ინჟინრები არიან.
პროექტის განხილვაში, ასევე, მონაწილეობდნენ საქართველოს მთავრობის წევრები, დიასპორის საკითხებში საქართველოს სახელმწიფო მინისტრი, გელა დუმბაძე და საქართველოს იუსტიციის მინისტრი, თეა წულუკიანი, აგრეთვე, საქართველოს საგანგებო და სრულუფლებიანი ელჩი საფრანგეთის რესპუბლიკაში, ეკატერინე სირაძე–დელონე და საგანგებო და სრულუფლებიანი დესპანი, გოჩა ჯავახიშვილი. აღსანიშნავია, რომ ქართულ მხარესთან ერთად ფრანგმა არქიტექტორებმა პროგრამირების დეტალები წარუდგინეს ლევილის ამჟამინდელ მფლობელებს, საქართველოს დამოუკიდებელი რესპუბლიკის მთავრობის თავმჯდომარის შთამომავლებს. განხილვას აგრეთვე ესწრებოდა ლევილის მერი, ერიკ ბრევი.
არქიტექტორთა მიერ წარმოდგენილი ანგარიში მოიცავს ლევილის მამულის ისტორიულ, არქიტექტურულ და ტექნიკურ ანალიზს, რომელიც მამულს ტერიტორიულ-ურბანისტულ ასპექტებში გაიაზრებს და მისი განვითარების ოპტიმალურ პერსპექტივებს სახავს. პროექტის მეორე ნაწილი, ასევე, განსაზღვრავს მამულის მომავალი მოწყობის სტრუქტურას. კერძოდ, მამულში ისტორიის, მეცნიერებისა და ხელოვნების ქართული აკადემიის დაარსებისა და მისი ფუნქციონირების სქემას: მამულში მოეწყობა პირველი დემოკრატიული რესპუბლიკის მუზეუმი, ქართული ემიგრაციის მუზეუმი, მეცნიერების სახლი, ბიბლიოთეკა და არქივი, რომელიც ხელმისაწვდომი გახდება ყველა დაინტერესებული პირისათვის, სადაც ისტორიკოსების, მკვლევარების, ხელოვანებისა და მწერლებისათვის შესაბამისი შემოქმედებითი მოღვაწეობის პირობები შეიქმნება. ისტორიულ სივრცეში, რომელიც შატოს მნიშვნელოვან ნაწილს დაიკავებს, პერიოდულად გაიმართება საქართველოს დამოუკიდებლობის, პირველი რესპუბლიკის, 1924 წლის ეროვნული აჯანყებისა და სხვა ისტორიული თარიღების აღსანიშნავი ღონისძიებები, კონფერენციები, გამოფენები და სხვა.
აღნიშნული პრეზენტაცია მნიშვნელოვანი წინგადადგმული ნაბიჯია ლევილის მამულის საქართველოსთვის დაბრუნების პროცესის დასრულებისათვის, რომელიც მრავალი წელია გრძელდება.
პრეზენტაციის დასრულების შემდეგ გელა დუმბაძემ და თეა წულუკიანმა სამუშაო შეხვედრა გამართეს პირველი რესპუბლიკის მთავრობის წევრთა ოჯახების წარმომადგენლებთან, რომლებსაც ბევრი კონკრეტული შეკითხვა ჰქონდათ ლევილის შატოს მამულის მომავალ ფუნქციონირებასთან და ამჟამად მამულში მობინადრე ადამიანების ბედთან დაკავშირებით.
ოჯახების წარმომადგენლებმა მადლობა გადაუხადეს მინისტრებს საინტერესო შეხვედრისათვის. დაიგეგმა მომდევნო შეხვედრა, რომელიც თებერვლის მეორე ნახევარში გაიმართება.