16 იანვრიდან საზოგადოებრივი მაუწყებლის პირველ არხზე ორი ახალი გადაცემა გავა ეთერში. ყოველ შაბათს 21:00 საათზე მაყურებელს შეუძლია ნახოს გადაცემა „ადამიანი კამერით“, რომელიც ფოტო და ვიზუალურ ხელოვნებას ეხება, წინასწარ შერჩეული 12 მოყვარული და პროფესიონალი ფოტოგრაფი ერთმანეთს სხვადასხვა დავალების შესრულებაში შეეჯიბრება.
ასევე ყოველ შაბათს-კვირას 19:30-ზე ეთერში იქნება გადაცემა „წიგნების თარო“, ორიგინალური ქართული ტელეთამაში, რომლის მონაწილეებიც 15-16 წლის მოზარდები არიან. პროექტის თემატიკას მხატვრული ლიტერატურა წარმოადგენს და შესაბამისად გამარჯვებისთვის მთავარი არის წიგნიერება.
ორივე გადაცემა საზოგადოებრივი მაუწყებლის მიერ გამოცხადებული შერჩევის გამარჯვებული პროექტია, კიდევ ორი გამარჯვებული პროექტი უკვე გადის პირველი არხის ეთერში, „დღე მუზეუმში“, ყოველ კვირას 15:00 საათზე, გადაცემა საქართველოს მუზეუმებში განთავსებული განძის, კოლექციების, უნიკალური ექსპონატების შესახებ. რომელთა შესახებ მაყურებელთა უმრავლესობას ალბათ, არც კი სმენია. ასევე პროექტი „მუსიკო♫ლოგოსი“, ყოველ შაბათს 17:00 საათზე, გადაცემაში ერთმანეთს ერწყმის პროფესიონალი კომპოზიტორისა და შემსრულებლის შეხედულებები, რომლებიც ხანდახან არ ემთხვევა ერთმანეთს, რაც საინტერესო დისკუსიას იწვევს.
