7 იანვარს, 14:00 საათზე, საშობაო საზეიმო მსვლელობა „ალილო“ ვარდების მოედნიდან დაიწყება და რუსთაველის გამზირისა და ბარათაშვილის აღმართის გავლით დასრულდება სამების საკათედრო ტაძარში.
რუსთაველის გამზირზე დღესასწაულს უერთდება პარლამენტის თავმჯდომარე, ქალაქის მერი და საკრებულოს თავმჯდომარე თანხმლებ პირებთან ერთად. ალილოს მონაწილეებს და მოსახლეობას აქვს საშუალება შეწიროს ძღვენი, (ტკბილეული, ტანსაცმელი და ა.შ.), რომელიც შემდეგ დახარისხდება და 10 იანვარს დაურიგდებათ ბავშვთა სახლებს, სასჯელაღსრულების დაწესებულებებს და მოხუცთა თავშესაფრებს.
მრავალი წელია ქრისტეშობას - 7 იანვარს თბილისში ეწყობა ტრადიციული საშობაო საზეიმო მსვლელობა „ალილო“. დღესასწაულის მოწყობის ტრადიცია 2000 წელს აღდგა კათოლიკოს–პატრიარქის ილია II კურთხევით. მსვლელობაში მონაწილეობს ქალაქ თბილისის მოსახლეობა, მრევლი და სამღვდელოება.
