შემოსავლების სამსახური ეხმაურება ბიზნესმენ დავით ზოდელავას ღია წერილს, რომელიც 28 დეკემბერს გავრცელდა მედიის საშუალებით. განცხადებას ,,ჯი-ეიჩ-ენი“ უცვლელად გთავაზობთ:
,,წერილის ავტორი, შემოსავლების სამსახურის კანონით რეგულირებულ საქმიანობას, სამსახურის მიმართ შეურაცხმყოფელ კონტექსტში მოიხსენიებს და აცხადებს: „23 დეკემბერს თავს დაგვესხა შემოსავლების სამსახურის ოპერატიული ჯგუფი შემოწმების მიზნით ლაბორატორიის შვილობილ კომპანიაში: ბიო პროდუქციის ანალიზის და რეალიზაციის პუნქტში, რომლის დირექტორიც მე გახლავართ და რომელსაც დღეში 300-500 ლარიანი ბრუნვა აქვს“.
გვინდა განვაცხადოთ: ბიზნესმენი ზოდელავა ცრუობს, რადგან შპს ტესტ ლაბორატორიაში (ს/ნ 404988055), ასევე, ამავე ბიზნესმენის მიერ დაფუძნებულ კიდევ ერთ კომპანიაში, შპს გრუზპლოდექსპორტში (ს/ნ 445451788), შემოსავლების სამსახურის აუდიტის დეპარტამენტის მიერ, რეგისტრაციის დღიდან 2015 წლის 29 დეკემბრის ჩათვლით, საგადასახადო შემოწმება არ ჩატარებულა. არ არსებობს წერილში აღნიშნული ე.წ. შვილობილი კომპანიაც.
თუმცა, დავით ზოდელავას მფლობელობაში არსებობს კიდევ ერთი კომპანია - შპს „D&Company და კომპანიას“ (ს/ნ 405008076), რომელიც ეწევა საყოფაცხოვრებო საქონლით საცალო ვაჭრობას (ელექტროსიგარეტები, ელექტროსიგარეტის სითხეები, სადგამები და ა.შ.). აღნიშნულ კომპანიაში ბიუჯეტთან ანგარიშსწორების სისწორის კუთხით შესაძლო რისკ-ფაქტორების გათვალისწინებით, მიმდინარეობს საგადასახადო შემოწმება. შპს „D&Company და კომპანიას“, თავისი საქმიანობიდან გამომდინარე, არ განიხილება, როგორც შპს ტესტ ლაბორატორიის შვილობილი კომპანია.
აქვე განვმარტავთ, საგადასახადო შემოწმება დაუშვებელია განიხილებოდეს სახელმწიფოს მხრიდან ბიზნესზე თავდასხმის კონტექსტში. მეტიც, ეს არის სახელმწიფოს წინააღმდეგ მიმართული, მიზანმიმართული, ზიანის მომტანი განცხადება. შემოსავლების სამსახური ახორციელებს მასზე კანონით დაკისრებულ ფუნქციას ანალიზზე დაფუძნებული მონიტორინგის ფარგლებში და ამოწმებს ამა თუ იმ კომპანიის სახელმწიფო ბიუჯეტთან ანგარიშსწორების საკითხებს“, - ნათქვამია განცხადებაში.