საქართველოს მთავრობამ დეპუტატების მიერ შესაბამის პროექტთან დაკავშირებით გამოთქმულ შენიშვნებზე დღევანდელ სხდომაზე იმსჯელა და როგორც ფინანსთა მინისტრმა კახა ბაინდურაშვილმა ჟურნალისტებს განუცხადა, "სრულად გაითვალისწინა".

"დეპუტატების ძირითადი შენიშვნები ჯანდაცვის სფეროს დაფინანსებას უკავშირდებოდა. მიუხედავად იმისა, რომ მომავალი წლის ბიუჯეტში აღნიშნული უწყების დაფინანსების ზრდა იყო გათვალისწინებული, ბიუჯეტიდან ამოღებული იყო 4 პროგრამის დაფინანსება. თუმცა პარლამენტმა მათი დაფინანსება მოითხოვა და 2010 წლის ბიუჯეტში ეს პროგრამებიც დაფინანსდება. 2010 წელს ჯანდაცვის სფეროს სულ 60 მლნ ლარი მოხმარდება", - განაცხადა ბაინდურაშვილმა.

მისივე განმარტებით, დეპუტატების შენიშვნის გათვალისწინებით 200 ათასი ლარით შემცირდება საგარეო დაზვერვის დაფინანსება.

"აღნიშნული კაპიტალური და სასაქონლო ხარჯების შედეგად მიღწეული შემცირება იქნება", - განაცხადა ბაინდურაშვილმა.

შეგახსენებთ, რომ 2010 წლის სახელმწიფო ბიუჯეტის პროექტის პირველი ვარიანტი პარლამენტმა ერთხელ უკვე განიხილა და გარკვეული შენიშვნებით მთავრობას უკან დაუბრუნა.