საქართველოს საკონსტიტუციო სასამართლოს თავმჯდომარე გიორგი პაპუაშვილი კიევში შავი ზღვისა და ბალტიისპირეთის რეგიონის ქვეყნების საკონსტიტუციო სასამართლოების კონსტიტუციური მართლმსაჯულების ასოციაციის პირველ სამუშაო შეხვედრას დაესწრო.
საკონსტიტუციო სასამართლოს ინფორმაციით, ასოციაციის შექმნაზე მემორანდუმს შავი ზღვისა და ბალტიისპირეთის ქვეყნების საკონსტიტუციო სასამართლოების თავმჯდომარეებმა 26 ოქტომბერს ვილნიუსში მოაწერეს ხელი. საკონსტიტუციო სასამართლოს თავმჯდომარემ მონაწილეობა მიიღო კრიზისების ჯგუფის მიერ ორგანიზებულ მედია მარათონში უკრაინაში სასამართლო რეფორმებთან დაკავშირებით და მიწვეული იყო საზოგადოებრივი რადიოს პირდაპირ ეთერში.
გიორგი პაპუაშვილი სამუშო ვიზიტის ფარგლებში საერთაშორისო კონფერენციას "კონსტიტუციური სარჩელის შემოღება უკრაინაში" დაესწრება. შეხვედრაში უკრაინის, საქართველოს, პოლონეთის, ლატვიის, ლიტვისა და მოლდოვას საკონსტიტუციო სასამართლოების თავმჯდომარეები და წევრები, ეუთო-ს, ევროკავშირის, გერმანიის საერთაშორისო სამართლებრივი თანამშრომლობის ფონდისა (IRZ) და აშშ-ის საერთაშორისო განვითარების სააგენტოს (USAID) "სამართლიანობის" პროექტის, უკრაინის სახელისუფლებო ორგანოებისა და აკადემიური წრეების წარმომადგენლები მონაწილეობენ.
