მარეგულირებელი კომისიების წარმომადგენელთა და "საპარტნიორო ფონდის" ხელმძღვანელის ხელფასებზე ზედა ზღვარის დაწესების შესახებ აკაკი ბობოხიძის ინიციატივას, დარგობრივი ეკონომიკისა და ეკონომიკური პოლიტიკის საპარლამენტო კომიტეტმა მხარი არ დაუჭირა.
განხილვას დღეს მარეგულირებელი ორგანოების წარმომადგენლებიც ესწრებოდნენ. მათი განცხადებით, კანონპროექტი ერთი მხრივ ზღუდავს მათ დამოუკიდებლობას, ხოლო მეორე მხრივ, ევროპულ რეგულაციებს ეწინააღმდეგება.
კომიტეტის თავმჯდომარემ ზურაბ ტყემალაძემ კი განაცხადა, რომ ხელფასების შემცირება მაღალი კვალიფიკაციის კადრების კერძი სექტორში გადინებას გამოიწვევს.
შეგახსენებთ, აკაკი ბობოხიძის საკანონმდებლო პროექტებით, სემეკისა და კომუნიკაციების მარეგულირებელი კომისიის თავმჯდომარეების ხელფასები საკონსტიტუციო სასამართლოს თავმჯდომარის ყოველთვიური თანამდებობრივი სარგოს განაკვეთს არ უნდა აღემატებოდეს, ხოლო კომისიის წევრთა ხელფასი – საკონსტიტუციო სასამართლოს მოსამართლეთა ყოველთვიურ შრომით ანაზღაურებას. იგივე ეხება საპარტნიორო ფონდის ხელმძღვანელს.
დეპუტატის ინფორმაციით, "საპარტნიორო ფონდის" მთავარი აღმასრულებლის ხელფასი 21 ათასი ლარით არის განსაზღვრული, კომუნიკაციის ეროვნული კომისიის თავმჯდომარის ხელფასი 16 640 ლარია, სემეკის თავმჯდომარის ხელფასი – 12 ათასი ლარი, ხოლო წევრების – 11 900 ლარი.