მაღალმთიანი დასახლების სტატუსი 1600-მდე დასახლებულ პუნქტს მიენიჭება და რამდენიმე თვის შემდეგ, ეს სია გაიზრდება, -ამის შესახებ მთის განვითარების ეროვნული საბჭოს სხდომის დასრულების შემდეგ კომისიის ერთ-ერთმა წევრმა, რეგიონული განვითარებისა და ინფრასტრუქტურის მინისტრის მოადგილე თენგიზ შერგელაშვილმა განაცხადა.
მისივე თქმით, საქართველოს სოფლების 45% -ში, პირველი იანვრიდან საგადასახადო შეღავათების პაკეტი ამოქმედდება, ხოლო სოციალური შეღავათები - პირველი სექტემბრიდან.
„პირველი სექტემბრიდან ამოქმედდება სოციალური შეღავათები, ახალშეძენილ ბავშვზე დახმარება ორი წლის განმავლობაში და მატება პენსიონრების, ექიმებისთვის, ექთნებისთვის, მასწავლებლებისთვის და ა.შ.სოციალური შეღავათები ვადიანი არ არის და სანამ კანონის კონკრეტული ნორმა იმოქმედებს, მანამდე გაგრძელდება“, - განაცხადა შერგელაშვილმა.
მისი ინფორმაციით, სოციალურ შეღავათებზე 2016 წელს ჯამში დაიხარჯება 40 მლნ-მდე ლარი, ხოლო 2017 წელს ეს თანხა 80 მლნ-ს მიაღწევს.
