დედაქალაქის მუნიციპალიტეტის საკრებულოს მაჟორიტარი წევრი ვლადიმერ ძნელაძე ორგანიზაციის ,,პირველი ნაბიჯი საქართველო’’ მიერ 2015 წლის საქმიანობის შემაჯამებელ პრეზენტაციას დაესწრო.
ღონისძიება, რომელზეც ორგანიზაციის 2016 წლის გეგმებსა და გამოწვევებზე ისაუბრეს, ევროპის სახლში გაიმართა და მას ვლადიმერ ძნელაძესთან ერთად ორგანიზაციის წარმომადგენლები და მოწვეული სტუმრები ესწრებოდნენ.
დღესვე დაანონსდა 2016 წლის ერთობლივი სოციალური კამპანია, რომლის სახეებიც ქართველი რაგბისტები გახდებიან და რომლებთანაც სადღესასწაულოდ ორგანიზაცია ,,პირველი ნაბიჯი’’ურთიერთთანამშრომლობის მემორანდუმს მოაწერს ხელს. აღნიშნული კამპანიის მიზანი შეზღუდული შესაძლებლობების მქონე ბავშვების, ასევე მოზარდების განვითარების და სოციალური ინტეგრაციის ხელშეწყობაა.
,,პირველი ნაბიჯი საქართველო’’ განსაკუთრებული საჭიროების მქონე ბავშვებს და მოზარდებს უკვე 17 წელია ემსახურება. დღევანდელი ღონისძიება შშმ პირთა დაცვის კვირეულის ფარგლებში იმართება და ორგანიზაციის მეგობრებს, დონორებსა და მხარდამჭერებს ეძღვნება’’,-განაცხადა ვლადიმერ ძნელაძემ და ორგანიზაციას გაწეული საქმიანობისთვის მადლობა გადაუხადა.
ორგანიზაციის ,,პირველი ნაბიჯი საქართველო’’ დახმარებით ასობით შეზღუდული შესაძლებლობების მქონე ბავშვმა დატოვა ბავშვთა სახლი და საკუთარ ოჯახს დაუბრუნდა.
ამჟამად ორგანიზაციის ძალისხმევით სხვადასხვა ფსიქოლოგიური, საგანმანათლებლო და ოჯახის მხარდაჭერი პროგრამები ხორციელდება.
