10 დეკემბერს საქართველოს ტექნიკური უნივერსიტეტის ბიზნეს-ინჟინერინგის ფაკულტეტის საინჟინრო ეკონომიკის დეპარტამენტის ეკონომიკის პროგრამის ,,უძრავი ქონების ეკონომიკის“ მოდულის სტუდენტებისთვის ლექცია წაიკითხა საქართველოს უძრავი ქონების შემფასებელ ექსპერტთა ინსტიტუტის დირექტორმა, პროფესორმა გიორგი ხმალაძემ. ლექციას ესწრებოდა ,,უძრავი ქონების“ მოდულის 26 სტუდენტი, ასევე, სხვა სპეციალობის სტუდენტები და დეპარტამენტის პროფესორ-მასწავლებლები.
პროფესორმა გ. ხმალაძემ ისაუბრა უძრავი ქონების შეფასების მსოფლიო გამოცდილების შესახებ, აღნიშნულ სფეროში საერთაშორისო სტანდარტების დანერგვისა და კანონმდებლობის შემუშავების აუცილებლობისა და მათი ინსტიტუტის მიერ ამ მიმართულებით განხორციელებული აქტივობების თაობაზე; ხაზი გაუსვა ევროპული, ამერიკული და რუსული შეფასების მეთოდების თავისებურებებს; განიხილა ამ სფეროში საქართველოში არსებული სიტუაცია. მისი აზრით, მიუხედავად იმისა, რომ მათი ინსტიტუტი, საქართველოს ტექნიკური უნივერსიტეტის საინჟინრო ეკონომიკის დეპარტამენტი და სხვა დაინტერესებული მხარეებიც აქტიურად მუშაობენ ამ მიმართულებით, მაინც ბევრი რამ არის გასაკეთებელი, ხოლო დარგი პროფესიონალი და სერტიფიცირებული სპეციალისტების მწვავე დეფიციტს განიცდის.
საქართველოს უძრავი ქონების შემფასებელ ექსპერტთა ინსტიტუტსა და საქართველოს ტექნიკურ უნივერსიტეტს შორის ურთიერთანამშრომლობის შესახებ გაფორმებული მემორანდუმის ფარგლებში, გიორგი ხმალაძემ სტუდენტებს უძრავი ქონების შემფასებლის სასერტიფიკაციო გამოცდების შეღავათიან ფასებში გავლა და ასევე შემდგომი მხარდაჭერა შესთავაზა.
გიორგი ხმალაძე მზადაა, დეპარტამენტში არსებული „უძრავი ქონების“ მოდულის განახლებისა და დახვეწის პროცესში მონაწილეობა მიიღოს.
მომხსენებელს შეკითხვები დაუსვეს სტუდენტებმა: მ. ხვიჩიამ. ლ. აფციაურმა, მ. ძიგვაშვილმა, ქ. სულაძე, მ. სიხარულიძე და სხვებმა. მას საინტერესო მოხსენებისთვის მადლობა გადაუხადეს და საინტერესო კითხვები დაუსვეს პროფესორებმა: ი. მამალაძემ, დ. სეხნიაშვილმა, ნ. ჭიკაიძემ, ა. სიჭინავამ.
პროფესორმა ალექსანდრე სიჭინავამ შეაჯამა ჩატარებული ლექციის მნიშვნელობა და გიორგი ხმალაძეს რამდენიმე მიმართულებით შემდგომი თანამშრომლობა შესთავაზა, რაზედაც დადებითი პასუხი მიიღო.