2015 წელს დედაქალაქში გაორმაგდა ჯანდაცვის მიზნობრივი პროგრამები. ამის შესახებ დედაქალაქის მერმა დავით ნარმანიამ განვლილი ერთი წლის საქმიანობის ანგარიშის წარდგენისას განაცხადა.
თბილისის მერმა აღნიშნა, რომ დაიწყო აუტიზმის სპექტრის დარღვევის მქონე ბავშვთა რეაბილიტაციის პროგრამა, რომლის ფარგლებშიც სრულად არის ათვისებული ქალაქის რესურსი, დაკმაყოფილებულია მერიაში შესული განცხადებების 95%, 280 ბენეფიციარი დაახლოებით 110 000 ლარით დაფინანსდა.
„პირველად დაიწყო ძვლის ტვინის ტრანსპლანტაციის პროგრამა, რომლის ფარგლებშიც ლეიკემიის მქონე პაციენტებს უტარდებათ სრული მკურნალობა. პროგრამის ფარგლებში დაკმაყოფილდა ყველა მოთხოვნა და თითოეულ ბენეფიციარს დაახლოებით 200 000 ლარი გამოეყო“, - განაცხადა დავით ნარმანიამ.
დედაქალაქის მერის განცხადებით, თბილისის მერია, საყოველთაო დაზღვევის პროგრამასთან ერთად, უზრუნველყოფს ბენეფიციართა ოპერაციის, მედიკამენტების, ამბულატორიული მომსახურების, რადიოლოგიური კვლევების დაფინანსებას. ამ მიმართულებით, 2014 წლის აგვისტოდან 2015 წლის ნოემბრის ჩათვლით, 45 000-მდე მოქალაქისთვის გამოიყო 36 მლნ. ლარი.
