ერთი წლის განმავლობაში გადაიდგა არსებითი ნაბიჯები იმ საზოგადოებრივი დაკვეთის შესასრულებლად, რომელიც ასახულია ჩემს საარჩევნო პროგრამაში. ამის შესახებ დედაქალაქის მერმა დავით ნარმანიამ განვლილი ერთი წლის საქმიანობის ანგარიშის წარდგენისას განაცხადა.
მისი განცხადებით, თბილისის მთავრობამ 2015 წლის ბიუჯეტის დაგეგმვისას უპირატესობა მიანიჭა თითოეული მოქალაქისათვის უმნიშვნელოვანეს თემებს - ჯანდაცვა და სოციალური უზრუნველყოფა, ინფრასტრუქტურის განვითარება, გარემოს დაცვა, სკოლამდელი განათლება.
“დაფინანსება შემცირდა თბილისის წარმომადგენლობითი და აღმასრულებელი ორგანოების ადმინისტრაციული ხარჯების ნაწილში 1 853 000 ლარის ოდენობით, ასევე, ბიუჯეტის ოპტიმიზაციისთვის 2015 წელს საქალაქო სამსახურებისა და რაიონული გამგეობების საპრემიო ფონდი განისაზღვრა 8 718 500 ლარის ოდენობით, რაც 2014 წლის შესაბამის მაჩვენებელზე (11 786 000 ლარი) 3 067 500 ლარით ნაკლებია”, - განაცხადა ნარმანიამ.