პარლამენტის თავმჯდომარემ დავით უსუფაშვილმა საკანონმდებლო ორგანოში სახელმწიფოს მზრუნველობის ქვეშ მყოფ ბავშვებს უმასპინძლა.
როგორც ჟურნალისტებს უსუფაშვილმა განუცხადა, კამპანიის „ჩააბარე მაკულატურა – გადაარჩინე ხეების“ ფარგლებში, პარლამენტმა 22 ტონა მაკულატურა ჩააბარა, რომლის სანაცვლოდ, 634 საგანმანათლებლო, სამეცნიერო, საბავშვო და შემეცნებითი ტიპის წიგნი მიიღო.
მისი ცნობით, ეს წიგნები საჩუქრად ბავშვებს გადაეცემა.
უსუფაშვილის განცხადებით, ბავშვებს სახელმწიფო დახმარებას უწევს და ისინი უზრუნველყოფილი არიან საცხოვრებლით, სასწავლებლით, მაგრამ კიდევ დამატებითი ყურადღება სჭირდებათ.
„ის რაც ამ ბავშვებს აკლიათ, რთულად შესავსებია და ყველას მონდომებაა საჭირო. მათ სურთ, სრულფასობანი მოქალაქეები იყვნენ“, - დასძინა უსუფაშვილმა.
ბავშვებისთვის პარლამენტში ექსკურსია მოეწყო.
