პარლამენტის განათლებისა და მეცნიერების კომიტეტმა „ზოგადი განათლების შესახებ” კანონპროექტს მხარი არ დაუჭირა, რომელიც სასკოლო ასაკის ხუთ წლამდე შემცირებას ითვალისწინებს.
კომიტეტის სხდომაზე ოპოზიციონერმა დეპუტატმა, კობა სუბელიანმა ცვლილებების არსი კანონმდებლებს გააცნო, რომლის შემდეგ საკითხს კენჭი უყარეს.
კომიტეტის თავმჯდომარის, ვანო კიღურაძის განცხადებით, 5 წლის ასაკის ბავშვი სკოლაში არ უნდა შევიდეს.
„ჩვენი სკოლა კადრების როგორ შიმშილს განიცდის, კარგად ვიცი. თუ ბავშვს 6 წელი არ შეუსრულდა, მისი სკოლაში გაშვება ცოდვაა. საქმე ბავშვებს ეხება. იმისათვის, რომ პოლიტიკური ქულები ჩაიწეროთ, ამ ძალიან ფაქიზი თემის პოლიტიზირება საჭირო არ არის“, - განაცხადა კიღურაძემ.
ცვლილებებით, საჭიროების შემთხვევაში, მშობელი უზრუნველყოფილი იქნება ზოგადი განათლების დაწყებით საფეხურზე სწავლის დაწყების უფლებით ბავშვის 5 წლის ასაკიდან. დღეს მოქმედი კანონით კი, განათლების დაწყებით საფეხურზე სწავლის დაწყების ასაკი 6 წელია.