ენმ-ის საზოგადოებასთან ურთიერთობის მდივანი, ზურაბ ჭიაბერაშვილი აცხადებს, რომ პარტია პენსიის ზრდასთან დაკავშირებით დაწყებულ კამპანიას გააგრძელებს. მისი განცხადებით, ბიუჯეტში არსებობს რესურსი პენსია არა 20, არამედ 50 ლარით გაიზარდოს.
"ბიძინა ივანიშვილის მთავრობამ დღემდე ორჯერ შეიტანა პარლამენტში ბიუჯეტის პროექტი და არც ერთ მათგანში გათვალისწინებული არ ყოფილა პენსიების მატება, რაც პირდაპირ მიუთითებს იმაზე, რომ ისინი არც გეგმავდნენ აღნიშნულს, რომ არა ჩვენი აქტივობა, რომელიც პენსიების გაზრდის მოთხოვნით დავიწყეთ.
ჩვენ ეს კამპანია დავიწყეთ პირველ რიგში იმიტომ, რომ მედიკამენტებსა და სურსათზე ფასები ძალიან მომატებულია ლარის დევალვაციის გამო. პენსიონერები ის ხალხია, რომლებიც ყველაზე მეტად მოიხმარენ მედიკამენტებს, ამიტომ, რადგან პენსია ფასებს ვერ ეწევა, ბუნებრივია, ჩვენ პენსიის 50 ლარით გაზრდის თაობაზე დაწყებულ კამპანიას გავაგრძელებთ. რატომ 50 ლარით? კარგად იცით, რომ 2012 წელთან შედარებით ბიუროკრატიის ხარჯი 456 მილიონი ლარითაა გაზრდილი, აქ არ შედის ახალი მანქანების შესყიდვა და კომფორტის მოწყობა, ესაა მხოლოდ შრომის ანაზღაურება. ამიტომ, თუკი ხელისუფლების პოლიტიკური ნება არსებობს და შეუძლიათ ქამრების რეალურად შემოჭერა, მაშინ საკმარისი რესურსია, რომ პენსია 50 ლარით გაიზარდოს", - აღნიშნა ჭიაბერაშვილმა.
მისივე შეფასებით, მთავრობას უბრალოდ არ სურს პრემიებსა და პენსიებთან დაკავშირებით "ქამრები შემოიჭიროს".
"ჩვენი შეფასება იმ განცხადებაზე, რაც ბიძინა ივანიშვილის თანაშემწე ირაკლი ღარიბაშვილმა გააკეთა, არის მარტივი - უბრალოდ მათ არ უნდათ მოიკლონ დანამატები და პრემიები. თორემ, საკმარისი რესურსია და ეს ჩვენ დასაბუთებულადაც დავუდეთ მათ. მხოლოდ 20 ლარით მომატებას 84 მილიონი ლარი სჭირდება, როცა რესურსი გაცილებით დიდია. ამიტომ, ჩვენ ვაგრძელებთ კამპანიას და ზეწოლას ხელისუფლებაზე. რომ არა ეს ზეწოლა, აღნიშნული 20 ლარიანი მატებაც არ იქნებოდა.
ახლა რაც შეეხება საკითხს, ეს ხომ არ დააზიანებს ქვეყნის ეკონომიკას? - არა. საუბარი რომ იყოს ეკონომიკიდან დამატებითი სახსრების ამოღებაზე, მაშინ შეიძლებოდა ასეთი ეჭვი გვქონოდა. სინამდვილეში აქ საუბარია იმაზე, რომ ეს ფული, შრომის ანაზღაურების სახით გამოვა ბაზარზე თუ პენსიის სახით, ეს ფული მაინც გამოდის, ამიტომ ამას ეკონომიკისთვის დამანგრეველი სახე არ აქვს", – განმარტა ჭიაბერაშვილმა.
