საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ (სემეკ) 26 ნოემბრის საჯარო სხდომაზე შპს „რუსთავის წყალს“ წყალმომარაგების ზღვრული ტარიფები დაუდგინა: გამრიცხველიანებული საყოფაცხოვრებო მომხმარებლებისათვის ტარიფი 0.343 თეთრი/მ3-ით განისაზღვრა; გაუმრიცხველიანებელი საყოფაცხოვრებო მომხმარებლებისათვის - 1.754 ლარით/სულზე/თვეში, ხოლო არასაყოფაცხოვრებო მომხმარებლებისათვის - 2.284 თეთრით/მ3-ზე. ტარიფები ძალაშია კომისიის შესაბამისი დადგენილების გამოქვეყნებისთანავე და მოქმედებს 2016 წლის 31 დეკემბრის ჩათვლით. 
ტარიფები მოცემულია დღგ-ს გარეშე. 
„წყალმომარაგების ტარიფების დადგენის მეთოდოლოგიის საფუძველზე, შპს „რუსთავის წყალს“ ტარიფები პირველად დაუდგინდა. მანამდე, კომპანია ქ. რუსთავის ადგილობრივი თვითმმართველი ერთეულის მიერ განსაზღვრული ტარიფით სარგებლობდა. 
წყალმომარაგების ზღვრული ტარიფების (ზედა ზღვარი) დადგენის მიზნით შპს „რუსთავის წყალმა“ კომისიას წერილობით 2015 წლის 15 ივნისს მიმართა. იმის გამო, რომ კომპანიას სრულყოფილად არ ჰქონდა წარმოდგენილი შესაბამისი სატარიფო დოკუმენტაცია, შპს „რუსთავის წყალს“ ხარვეზის აღმოსაფხვრელად 45 დღიანი დამატებითი ვადა განესაზღვრა. კომპანიამ სრულყოფილი დოკუმენტაცია კომისიას 2015 წლის 29 ივნისს წარუდგინა. შპს „რუსთავის წყალისათვის“ წყალმომარაგების ზღვრული ტარიფების (ზედა ზღვარი) დადგენის თაობაზე საჯარო ადმინისტრაციული წარმოება მიმდინარე წლის 16 ივლისს დაიწყო. აღნიშნულ საკითხზე კომისიაში წინადადებების წარმოდგენის ბოლო ვადად 2015 წლის 14 აგვისტო, ხოლო გადაწყვეტილების მიღების ბოლო ვადად - 2015 წლის 27 ნოემბერი იყო განსაზღვრული“, - აცხადებენ სემეკში.