„ქალთა მოძრაობის“ წევრი ბაია პატარაია დიასპორის საკითხთა კომიტეტის თავმჯდომარეს, თემურ ჭკუასელს სექსიზმსა და ქალების შეურაცხყოფაში ადანაშაულებს.
პარლამენტის ადამიანის უფლებათა დაცვის კომიტეტის დღევანდელ სხდომაზე, პატარაისა და ჭკუასელს შორის დაპირისპირების მიზეზი „საარჩევნო კოდექსში“ დაგეგმილი ცვლილებები გახდა.
ცვლილებების წარდგენისას, ჭკუასელმა ქალთა კვოტირების წესზე ისაუბრა და აღნიშნა, რომ მამაკაცებს უფრო გლობალური აზროვნება აქვთ.
დეპუტატის ეს რეპლიკა პატარაიამ გააპროტესტა და ის ქალების შეურაცხყოფაში დაადანაშაულა.
პატარაიას ჭკუასელი გამოეხმაურა და განმარტა, რომ მას მხედველობაში ის ჰქონდა, რომ ქალებს გლობალურ აზროვნებასთან ერთად, თვისება აქვთ, რომ ყურადღება ისეთ დეტალებს მიაქციონ, რომელსაც ხანდახან, მამაკაცები ვერც ამჩნევენ.
შეგახსენებთ, რომ ცვლილებებით, პროპორციულ საარჩევნო სიაში სქესთა შორის ბალანსის დაცვის მიზნით, ყოველ მომდევნო სამ კანდიდატს შორის ერთი მაინც, განსხვავებული სქესის კანდიდატი უნდა იყოს.
