გენერალი გოგი თათუხაშვილი ნავთლუღის სპეცოპერაციის საქმეში მონაწილე სპეცრაზმელებს მიმართავს და მადლობას უხდის.
თათუხაშვილი მადლობას უხდის სპეცრაზმელებს, რომ არ გატყდნენ და არ დაასახელეს შალვა, როგორც ნავთლუღის ოპერაციის უშუალო შემსრულებელი,მონაწილე.
"დიდი მადლიერება და პატივისცემა მინდა გამოვხატო საქართველოს ნაღდი სპეცრაზმელების მიმართ, ვინც ჩემი შვილის გამო გადაიტანა მრავალი უადვოკატო დაკითხვები პროკურატურაში, ზეწოლა -წამება, შეურაცხყოფა. მათ არც სასამართლოში ჰყოლიათ თავიანთი ადვოკატები მიუხედავად ამისა, არ გატყდნენ და ძალადობის ქვეშ მიცემილ ჩვენებებში არ დაასახელეს შალვა, როგორც ნავთლუღის ოპერაციის უშუვალო შემსრულებელი, მონაწილე. ყველას ერთხმად უწერია, რომ არც ერთ სპეცრაზმელს იარაღი არ გამოუყენებია და შემთხვევის ადგილზე მივიდნენ ბოლოს, პერიმეტრის დასაცავად. თქვენ ასევე გიწერიათ სიმართლე, რომ სპეცრაზმი არც იურიდიულად, არც ფაქტიურად არ არსებობდა. ზოგი სად იყო დანიშნული, ზოგი სად, ნაწილი კი სამსახურში მიღებაზე კანდიდატები იყვნენ და ელოდებოდნენ შტატების დამტკიცებას.
2006 წლის 12 იანვარს სად და რა სახის ოპერაციაზე მიდიოდით, თქვენთვის არ იყო ცნობილი. ოპერაციის ადგილას, ნავთლუღში, მიხვედით ყველა ერთად მიკროავტობუსით. შალვა კი მივიდა თავისი ნივით...
იგივე უწერია ჩემს შვილს თქვენზე, რომ თქვენ საერთოდ არ მიგიღიათ მონაწილეობა ამ ოპერაციაში, არ გამოგიყენებიათ იარაღი და არ გაგისვრიათ არცერთი ტყვია. მისი ბრძანების თანახმად იცავდით მხოლოდ პერიმეტრს.
თქვენგან განსხვავებით, მიცემული აქვს ჩვენება თქვენს ყოფილ მეთაურს არჩილ არევაძეს, რომლის ჩვენება პროკურატურამ გამოაქვეყნა პირველ ფურცელზე საიდენტიფიკაციო ნიშნების წაშლით. დანარჩენ ფურცლებზე სიბეცით თუ შეგნებულად დატოვეს მისი ფაქსიმილია, რაც ადვილად იკითხება. მათ ასევე ,,გამორჩათ’’, რომ არევაძე ტექსტში რამდენიმე ადგილას ამბობს, შალვა თათუხაშვილი ჩემი მოადგილე იყოო. თქვენ ყველანი იყავით პროკურატურაში დაკითხვაზე დაბარებული 20- 21 თებერვალს. შალვა კი პროკურატურის მიერ იქნა გატაცებული 25 თებერვალს. ჩემი განცხადებების შემდეგ, სადაც ვამბობდი, რომ ჩემი შვილი გატაცებულია, პროკურატურამ თავის გამართლების მიზნით მხოლოდ 27 თებერვალს დაიბარა თქვენი ყოფილი მეთაური, არჩილ არევაძე. მის მიერ, თავისი ნებით, თუ იძულებით, მიცემულ ჩვენებაში, პირველი ნაწილი განსხვავდება მეორისგან.
,, ჩემს მოვალეობას ასრულებდა შალვა თათუხაშვილი. 2006 წლის იანვრის თვის შუა რიცხვებში, ზუსტი რიცხვი არ მახსოვს, ვიმყოფებოდი სახლში ზემოთაღნიშნულ მისამართზე. გვიან ღამით, თუ რომელი საათი იყო ზუსტად არ მახსოვს, ჩემს მობილურ ტელეფონზე, რომლის ნომერი იყო ...... დამიკავშირდა შალვა თათუხაშვილი მისი ტელეფონის ნომრით, რომლის ნომერი არ მახსოვს და აღელვებულმა მითხრა, რომ ნავთლუღის ავტოსადგურში ჩაატარეს სპეცოპერაცია და უნდოდა ჩემთან სახლში ამოსვლა.’’
,,შალვა თათუხაშვილმა მითხრა, რომ სამგორის ავტოსადგურის ტერიტორიაზე, დათა ახლაიას ხელმძღვანელობით, ჩაატარეს სპეცოპერაცია, რა დროსაც მოახდინეს სამი ახალგაზრდა მამაკაცის ლიკვიდაცია- ,,ტრუპები ავიკიდეთო''.
ჩვენების მეორე ნაწილში კი წერს, რომ სპეცრაზმის არც ერთ წევრს მონაწილეობა არ მიუღია და არც გაუსვრიათ.
მართლაც, ე.წ. ,,კუდ''-ის სპეცდანიშნულების რაზმი არ არსებობდა. ე.ი. იურიდიულად არ არსებული რაზმი, არც ფიზიკურად არსებობდა. იყო 2005 წლის ბოლოს ახლად შექმნილი ათკაციანი ჯგუფი, რომლის შემადგენლობაში შედიოდნენ სხვადასხვა ადგილას დანიშნული სამხედრო მოსამსახურეები და კანდიდატები, მათ შორის დაუნიშნავი კანდიდატები, ანუ სამოქალაქო პირები , რომლებიც ვარჯიშობდნენ მხოლოდ სპორტდარბაზში და მოიაზრებოდნენ სპეცრაზმის წევრებად შტატების დამტკიცების შემთხვევაში. არ არსებობდა საბრძოლო მომზადების გეგმა, არ იყო ჩატარებული არც ერთი მეცადინეობა, სროლები. ახალ მიღებული იარაღიდან სროლებიც კი არ იყო ჩატარებული იარაღის გასასწორებლად. იმ პერიოდისთვის მათ ჰქონდათ მხოლოდ ერთი ოთახი ,,კუდის’’ მეორე სართულზე და ახლად მიღებული ფორმა- შეიარაღება.
შალვა თათუხაშვილი ,,კუდის’’ ცენტრალურ აპარატში გადმოყვანილი იქნა შიდა ქართლიდან, სადაც მუშაობდა უფროსი ინსპექტორის თანამდებობაზე. 11.10.2005 წლის შსს ბრძანება N7041 დაინიშნა აქტიურ ღონისძიებათა განყოფილების უფროსის მოადგილედ.
სრულიად ვეთანხმები ,,კუდ’’-ის მაშინდელ ხელმძღვანელობას, დავით ახალაიას, როდესაც ეს არარსებული სპეცრაზმი უშუალოდ ოპერაციაში არ გამოიყენა და დაავალა მხოლოდ ოპერაციის შემდეგ შემთხვევის ადგილის, პერიმეტრის დაცვა.
ჩემო სპეცრაზმელებო, იმ ცნობილ ნავთლუღის ოპერაციაზე თანამდებობები, წოდებები, მედლები, ჯილდოები, დიდი პრემიები დარიგდა. მე ვიცი და დაზუსტებული მაქვს, რომ თქვენ ამ ოპერაციაზე ჯილდოები და პრემიები კი არა, მადლობაც კი არა გაქვთ მიღებული. ახლახანს მრავალი მცდელობის შემდეგ, როგორღაც მოვიპოვე ამონაწერი შალვას პირადი საქმიდან, სადაც 2005 წლის დეკემბერში მან მიიღო ორი პრემია ათას ლარზე მეტი, ამავე დროს 12 იანვრის ოპერაციაზე არაფერი აქვს მიღებული, ისევე როგორც თქვენ. მხოლოდ იანვრის თვის ბოლოს აიღო 400 ლარიანი პრემია. ილუსტრაციისათვის წარმოვადგენ შალვას პრემიების ნაწილს-ამონაწერს პირადი საქმიდან.
ასევე, შალვას პირადი საქმიდან ჩანს, რომ ოპერაციამდე ის იყო განყოფილების უფროსის მოადგილე და მერე დაქვეითდა განყოფილების უფროსის მოადგილე-გამომძიებლად. იმ პერიოდში არც წოდება მიუღია.
აქედან გამომდინარე, გთხოვთ მიმართოთ შინაგან საქმეთა სამინისტროს კადრებს და აიღოთ თქვენი პირადი საქმიდან ნამსახურობის ნუსხის ასლები და გამომიგზავნოთ მე. თქვენი ნამსახურობის ნუსხები საერთო საქმისთვისაა საჭირო.
მიუხედავად იმისა, რომ ჩემს წინააღმდეგ მუშაობს მთელი სახელწიფო მანქანა, შესაბამისად ჩემს ადვოკატს არა აქვს საშუალება მოიძიოს დოკუმენტები, მაინც მაქვს საკმარისი დოკუმენტაცია იმისათვის, რომ დავამტკიცო, შალვა არ იყო მკვლელი, მეტიც, საერთოდ არ მიუღია მონაწილეობა ზემოაღნიშნულ სპეცოპერაციაში. ასევე არ იყო ლოთი, არც ნარკომანი, არც თავი მოუკლავს, არც ლილოს ბორდელში ყოფილა ოდესმე, სანამ პროკურატურამ არ მიიყვანა იძულებით. რათა დადგმული დაკავების სცენით გაემართლებიათ შალვას ერთთვიანი მოტაცება.
პრორუსული მთავრობის და ბევრი წამყვანი მედია საშუალების ვერსია, რომ სპეცდანიშნულების რაზმმა შალვას მეთაურობით მოახდინა სამი უდანაშაულო ახალგაზრდის ლიკვიდაცია, არის სრული აბსურდი და რეალობასთან არანაირ კავშირშია.
კიდევ ერთხელ ვაცხადებ, შალვას მკვლელობასთან არაფერ შუაშია ახალაიების საქმე და 2006 წლის ნავთლუღის ოპერაცია. შალვა მოკლულია რუსეთის დავალებით, სპეცოპერაცია ,,კოდორი-2007’’-ის გამო. შემსრულებლები კი არიან ივანიშვილი, ღარიბაშვილი, ფარცხალაძე, გილაური, ძნელაშვილი." - წერს გოგი თათუხაშვილი