პარლამენტის ჯანდაცვის კომიტეტის თავმჯდომარის მოადგილის, მირიან წიკლაურის განცხადებით, ხშირ შემთხვევაში, ბავშვთა სააღმზრდელო სახლები ისეთ საქმიანობას აწარმოებენ, რომელიც ბავშვის უფლებებს აშკარად არღვევს.
წიკლაურმა ბავშვთა სახლებში არსებულ ვითარებაზე იურიდიულ საკითხთა კომიტეტის სხდომაზე ისაუბრა, სადაც იმ ცვლილებებზე იმსჯელეს, რომლის მიხედვით, სააღმზრდელო საქმიანობის სალიცენზიო პირობების შეუსრულებლობა, შესაძლოა კრიმინალური ქმედება გახდეს.
დეპუტატის თქმით, ხშირ შემთხვევაში, ასეთი სახლები ისე იხსნება, რომ ამის არანაირი საჭიროება არ არსებობს.
„ხშირ შემთხვევაში, ასეთი სახლები ისეთ საქმიანობას აწარმოებენ, რომელიც ბავშვის უფლებებს აშკარად არღვევს. ბავშვის უფლებები და ინტერესები არის უპირველესი. დამერწმუნეთ, რომ არათუ ორ წლამდე სასჯელი, ხშირ შემთხვევაში, ისეთ რაღაცასთან შეიძლება გვქონდეს საქმე, რომელიც გაცილებით მეტ სასჯელს შეიძლება იმსახურებდეს. ერთი დღის გადაცილებამაც კი გამოუსწორებელ შედეგამდე შეიძლება მიგვიყვანოს – ისეთ შედეგამდე, რომელსაც შეიძლება ბავშვის სამუდამო დამახინჯება მოჰყვეს. ამიტომ ვფირობ, რომ ასეთი არალიცენზირებული სახლების გახსნა მსუბუქი დანაშაული არ არის. ეს საკმაოდ მძიმე დანაშაულია და კანონის დარღვევა მკაცრად უნდა ისჯებოდეს, ისევ ბავშვის ინტერესების გათვალისწინებით”, - აღნიშნავს წიკლაური.
დეპუტატის ცნობით, ბავშვები მათი ბიოლოგიური ისე ოჯახებიდან გამოყავთ, რომ ამას არ საჭიროებენ.
„პრაქტიკაში არის შემთხვევები, როცა ასეთ სახლებს უკანონო სააღმზრდელო საქმიანობისთვის ადმინისტრაციული წესით დაკისრებული 3000 ლარიანი ჯარიმის გადახდა უღირთ. საკანონმდებლო პროექტის შემუშავების მიზეზს სწორედ სააღმზრედელო საქმიანობის სფეროში არსებული ახალი გამოწვევები წარმოადგენს, რასაც მოქმედი კანონი ვერ პასუხობს“, - დასძინა წიკლაურმა.