დედაქალაქის მუნიციპალიტეტის საკრებულოს თამარ მეფის სახელობის დარბაზში ფრანგი ხალხის თანაგრძნობისთვის სამძიმრის წიგნი გაიხსნა, სადაც საქართველოს პრეზიდენტმა, მთავრობის ადმინისტრაციის უფროსმა, ქვეყნისა და თბილისის მთავრობის წევრებმა, დედაქალაქის მერმა, საქართველოში აკრედიტებულ დიპლომატიური კორპუსის წარმომადგენლებმა, ასევე მოქალაქეებმა ჩანაწერები გააკეთეს და 13 ნოემბერს პარიზში დატრიალებული ტრაგედიების გამო ფრანგ ხალხს მიუსამძიმრეს.
თბილისის საკრებულოში დილიდან საფრანგეთის ელჩი საქართველოში რენო სალენსი, საელჩოს წარმომადგენლები და საკრებულოს თავმჯდომარე გიორგი ალიბეგაშვილი იმყოფებიან.
,,საფრანგეთში დატრიალებული ტრაგედია მხოლოდ ფრანგი ერის ტკივილი არ არის. ეს არის მთელი ცივილიზებული მსოფლიოსთვის მიყენებული დარტყმა, რომელსაც გამკლავება სჭირდება.
მომხდარის გამო საფრანგეთის ხელისუფლებას, დაღუპულთა ოჯახებს და ფრანგ ხალხს თანაგრძნობასა და სამძიმარს ვუცხადებ’’,- განაცხადა გიორგი ალიბეგაშვილმა.
როგორც საფრანგეთის ელჩმა საქართველოში რენო სალენსმა აღნიშნა, სამძიმრის წიგნები მთელი მსოფლიოს მასშტაბით გაიხსნა.
მანვე ცერემონიალის ორგანიზებისათვის საქართველოს მთავრობას მადლობა გადაუხადა.
