სამოქალაქო ჩართულობის ცენტრი" მიიჩნევს, რომ "საქართველოს პატრიოტთა ალიანსის" პოლიტსაბჭოს წევრის განცხადება სიძულვილის ენის შემცველია. ამის შესახებ ორგანიზაციის მიერ გავრცელებულ განცხადებაშია ნათქვამი.
მათი ინფორმაციით, 10 ნოემბერს, არასამთავრობო ორგანიზაციებისა და აზერბაიჯანული თემის წარმომადგენლებმა "სამოქალაქო ჩართულობის ცენტრს" მიმართეს ტელეკომპანია "ობიექტივის" ერთ-ერთი გადაცემის სტუმრის - პოლიტიკური პარტია "საქართველოს პატრიოტთა ალიანსის" პოლიტსაბჭოს წევრ ვაჟა ოთარაშვილის მიერ აზერბაიჯანელი მოსახლეობის მისამართით გაკეთებულ შეურაცხმყოფელ განცხადებასთან დაკავშირებით. მათი განცხადებით ვაჟა ოთარაშვილმა აზერბაიჯანული თემი შეურაცხმყოფელი და დამამცირებელი ეპითეტებით მოიხსენია.
ორგანიზაცია მიიჩნევს, რომ "საქართველოს პატრიოტთა ალიანსის" პოლიტსაბჭოს წევრის განცხადება სიძულვილის ენის შემცველია, რაც ეთნიკური ნიშნით პირთა დისკრიმინაციაში იქნა გამოხატული.
"მოგეხსენებათ, რომ ევროპის საბჭოს მინისტრთა კომიტეტის 1997 წელს მიღებული რეკომენდაციის თანახმად სიძულვილის ენა მოიაზრებს გამოხატვის ყველა ფორმას, რომელიც ავრცელებს, აქეზებს, ხელს უწყობს ან ამართლებს რასობრივ შუღლს, ქსენოფობიას, ანტისემიტიზმს ან შეუწყნარებლობაზე დაფუძნებულ შუღლის სხვა ფორმებს, ნაციონალიზმის, ეთნოცენტრიზმის, დისკრიმინაციისა და უმცირესობათა ან მიგრანტთა მიმართ გამოხატული მტრობის ჩათვლით. ბ-ნი ვაჟა ოთარაშვილის მის მიერ გაკეთებულ განცხადებაში ეთნიკურად აზერბაიჯანელ საქართველოს მოქალაქეებს "ნახირებად" მოიხსენიებს, რითაც შეურაცხჰყოფს მათ გონებრივ შესაძლებლობას, თითქოსდა აზერბაიჯანელ თანამოქალაქეებს არ გააჩნიათ საღი აზრი, რომ სახელმწიფოებრივი მნიშვნელობის მქონე საკითხების გადაწყვეტაში მიიღონ მონაწილეობა", - აცხადებენ "სამოქალაქო ჩართულობის ცენტრში".
მათივე შეფასებით, საქართველოს, როგორც დემოკრატიული ღირებულებების მქონე სუბიექტს, მსგავსი ტიპის განცხადებები მნიშვნელოვან ზიანს აყენებს.
"სამწუხაროა, რომ აღნიშნული განცხადება საქართველოს ერთ-ერთი პოლიტიკური პარტიის პოლიტსაბჭოს წევრის მხრიდან იქნა გაკეთებული, ვინაიდან მიგვაჩნია, რომ პარტიის წევრს, რომელიც პირდაპირ თუ ირიბად არის ჩართული პოლიტიკურ პროცესებში და ქვეყნის სტაბილურობისა და უსაფრთხოების პოტენციურ დამცველად და გარანტად გვევლინება, უპირატესად ევალება პატივი სცეს ადამიანის ძირითად უფლებებსა და თავისუფლებებს და თავი შეიკავოს დისკრიმინაციული და სიძულვილის ენის შემცველი განცხადებებისაგან, ნაცვლად იმისა, რომ ეთნიკური უმცირესობების წარმომადგენლებს გაუჩინოს შეგრძნება, რომ საქართველოს სახელმწიფოს სრულფასოვანი მოქალაქეები არ არიან", - აცხადებენ "სამოქალაქო ჩართულობის ცენტრში".
ორგანიზაცია მიიჩნევს, რომ როდესაც საქმე ეროვნული უმცირესობების მიმართ მოპყრობას ეხება, მხედველობის მიღმა არ უნდა იქნეს დატოვებული "ეროვნული უმცირესობის საკითხთა კომისიის" მიერ გამოხატული დეტალური რეკომენდაციები, ასევე საერთაშორისო ორგანიზაციების: "ეროვნულ უმცირესობათა დაცვის შესახებ ჩარჩო-კონვენციის საკითხებზე მომუშავე საკონსულტაციო კომიტეტისა" და "რასიზმისა და შეუწყნარებლობის წინააღმდეგ - ევროპული კომისიის" მიერ საქართველოს მიმართ გაცემული რეკომენდაციები, რომელთა სისრულეში მოყვანისა და განმტკიცების ვალდებულებაც საქართველომ იკისრა.
მათივე შეფასებით, გასათვალისწინებელია, ასევე, "ეროვნულ უმცირესობათა დაცვის შესახებ" ევროპული კონვენციის მე-4 მუხლის პირველი ნაწილი, რომლის მიხედვითაც ხელშემკვრელი სახელმწიფოები იღებენ ვალდებულებას უზრუნველყონ ეროვნული უმცირესობებისადმი კუთვნილი პირების კანონის წინაშე თანასწორობა და კანონის მიერ თანაბარი დაცვა. ასევე, საერთაშორისო პაქტის 26-ე მუხლი, რომლის მიხედვითაც "თითოეული ადამიანი თანასწორია კანონის წინაშე და ყოველგვარი დისკრიმინაციის გარეშე კანონით თანაბარი დაცვის უფლება აქვს. ამ მხრივ უნდა აიკრძალოს ყოველგვარი დისკრიმინაცია და კანონი უნდა უზრუნველყოფდეს ყველა პირის თანასწორ და ეფექტურ დაცვას რასის, კანის ფერის, ენის , რელიგიის, პოლიტიკური თუ სხვა მრწამსის, ეროვნული და სოციალური წარმოშობის, ქონებრივი მდგომარეობის, დაბადების თუ სხვა გარემოებების გამო დისკრიმინაციისაგან".
,,სამოქალაქო ჩართულობის ცენტრი" გმობს მსგავსი ტიპის განცხადებებს, რომელიც შეიცავს სიძულვილის ენის გამოხატულებას და ჩვენი ქვეყნის სტაბილურობას რაიმე ფორმით ზიანს აყენებს ქვეშ აყენებს. აღნიშნულიდან გამომდინარე ორგანიზაცია საქართველოს სახალხო დამცველის ინსტიტუტს მომხდარი ფაქტით დაინტერესებისა და ადამიანთა კონსტიტუციით გარანტირებული უფლებების დაცვის უზრუნველსაყოფად კანონით გათვალისწინებული მექანიზმების ამუშავებისკენ მოუწოდებს", - ნათქვამია ორგანიზაციის მიერ გავრცელებულ განცხადებაში.