რუსთავი 2-ის დროებითი მმართველი დავით დვალი აცხადებს, რომ ტელეკომპანიაში შესვლას სამართალდამცავების დახმარებით არ აპირებს. ამის შესახებ მან დღეს გამართულ ბრიფინგზე დასმული კითხვის საპასუხოდ განაცხადა. კერძოდ, ჟურნალისტები დაინტერესდნენ, რა ფორმით აპირებენ ახალი დროებითი მმართველები ტელეკომპანიაში შესვლას, წინააღმდეგობის შემთხვევაში.
დვალმა ასევე გამოთქვა მზადყოფნა ნებისმიერ ადგილას შეხვდეს რუსთავი 2-ის კოლექტივს.
"მზად ვარ დავსხდეთ და ვისაუბროთ. თუ შემომიშვებთ "რუსთავი 2"-ში, თუ არადა სადმე, ნეიტრალურ ტერიტორიაზე. მე თქვენ გიყურებთ, როგორც ჩემს მომავალ თანამშრომლებს. სადაც გინდათ, როგორც გინდათ, შევხვდეთ. ვისაუბროთ ყველა ეჭვზე, რომელიც გაგაჩნიათ და ნებისმიერ მძიმე საკითხზე", - განაცხადა დავით დვალმა, რომელმაც ასევე აღნიშნა, რომ დროებითი მმართველები ტელეკომპანიაში ყოველგვარი დაძაბულობის გარეშე აპირებენ მისვლას, თუმცა მას ზუსტი დრო არ დაუსახელებია.
რაც შეეხება ქიბარ ხალვაშის ადვოკატის, პაატა სალიას, მისი თქმით , ტელეკომპანიაში შესვლის პროცესს იძულების ფორმა არ ექნება.
"მათ კეთილი უნდა ინებონ და ითანამშრომლონ, იმ მიზნით, რომ კომპანიამ განაგრძოს საქმიანობა. ისინის არიან დროებით უფლებამოსილება შეჩერებულები და არა გათავისუფლებულები. მათ აქვთ ვალდებულება, ითანამშრომლონ ახალ მმართველებთან, რომ მოხდეს აჟიოტაჟის გარეშე მიმდინარე საქმიანობის გადაბარება. ჩვენ ველით, რომ ეს ადამიანები ასე მოიქცევიან და კანონს დაემორჩილებიან,"- განაცხადა პაატა სალიამ.
ტელეკომპანია "რუსთავი 2"-ის ყოფილი მფლობელის, ჯარჯი აქიმიძის თქმით, ტელეკომპანიაში შესვლის პროცესში არ მოხდება "სპექტაკლის" დადგმა, როგორც ნიკა გვარამია იქცეოდა.
"დღეს არის 6 ნოემბერი, ისეთი რამ, რაც იყო გვარამიას მიერ დადგმული სპექტაკლი 7 ნოემბრის დოკუმენტური კინოს შესახებ, არ იქნება. არავინ არ შერბის და არავინ აკეთებს იმას, რაც მათ გააკეთეს შემდეგ კი გაახმოვანეს, დაარქვეს სახელმწიფო გადატრიალება და თურმე დღეს არის დემოკრატიის და თავისუფალი სიტყვის დამცველი, როდესაც დუბინკებით დასდევდნენ კოლეგებს,"- განაცხადა ჯარჯი აქიმიძემ.
