საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ თბილისში ბინების გადანაწილების მიზნით გამოცხადებული დამატებითი კონკურსის შედეგები გამოაქვეყნა.
დევნილთა საკითხების შემსწავლელმა კომისიამ, დევნილთა გრძელვადიანი საცხოვრებელი ფართით უზრუნველყოფის მიზნით თბილისში, „თბილისის ზღვის დასახლებაში“ („ოლიმპიური სოფელი“) და მენაშენეებისგან გამოსყიდულ იმ 27 ოთხოთახიან ბინაზე, რომელიც გასანაწილებელი დარჩა, დამატებით კონკურსი 21 0ქტომბერს გამოაცხადა.
უწყების ინფორმაციით, აპლიკაციების მიღება 31 ოქტომბერს დასრულდა და საცხოვრებელი ფართის მიღების მოთხოვნით განაცხადი 46-მა დევნილმა ოჯახმა შეავსო.
სამინისტროს დევნილთა საკითხების დეპარტამენტმა, დევნილი ოჯახების მიერ წარმოდგენილი დოკუმენტაციის საფუძველზე, გრძელვადიანი განსახლების კრიტერიუმების შესაბამისად, თითოეულ აპლიკანტს წინასწარი ქულა მიანიჭა. აღნიშნული ქულები ქვეყნდება სამინისტროს ვებ-გვერდზე.
სიის გამოქვეყნებიდან 15 სამუშაო დღის ვადაში დევნილ ოჯახებს შესაძლებლობა ეძლევათ წარმოადგინონ დამატებითი დოკუმენტაცია, რამაც შესაძლოა გავლენა მოახდინოს მათთვის წინასწარ მინიჭებულ ქულებზე.
შეგახსენებთ, აღნიშნული კონკურსის საჭიროების გამო, კიდევ ერთხელ გადაიდო ნგრევად და სიცოცხლისათვის (ან ჯანმრთელობისათვის) მომეტებული საფრთხის შემცველი ობიექტებიდან დევნილების გაყვანა.
ახალგაზრდული ოლიმპიადის დასრულების შემდეგ, ოლიმპიური სოფლის კომპლექსში რვა კორპუსის დევნილებისთვის საჩუქრად დაუყოვნებლივ გადაცემის შესახებ განცხადება პრემიერ-მინისტრმა, ჯერ კიდევ ახალგაზრდული ოლიმპიადის დაწყებამდე გააკეთა.
ოლიმპიადის დასრულების შემდეგ კი დევნილთა მინისტრმა განაცხადა, რომ დევნილები "ოლიმპიურ სოფელში" ბინების მიღებას ოქტომბრის ბოლომდე შეძლებდნენ. სოზარ სუბარის განმარტებით, ოლიმპიური სოფელი დევნილების ჩასახლებისთვის, წესით სექტემბერში უნდა ჩაბარებულიყო, თუმცა მისი თქმით, სამშენებლო კომპანიამ გარკვეული დრო ითხოვა.
ბინების მიღების პრეტედენტი დევნილი ოჯახების სიის გამოქვეყნება შემდეგში, 5-10 ოქტომბრისთვის იქნა დაანონსებული. თუმცა, სოზარ სუბარის უწყების ინფორმაციით, ახალი გარემოებების აღმოჩენის გამო, პროცესი ისევ გადაიდო. ახალი გარემოება კი 27 ბინაზე დამატებითი კონკურსის გამოცხადების საჭიროება გახდა.
სამინისტროს ინფორმაციით, დევნილთა გრძელვადიანი განსახლების პროცესი სამი მიმართულებით მიმდინარეობს:
1. ნგრევად და სიცოცხლისათვის ან ჯანმრთელობისათვის მომეტებული საფრთხის შემცველი ობიექტებიდან დევნილი ოჯახების გაყვანა;
2. სასამართლოს ან ზემდგომი ადმინისტრაციული ორგანოს გადაწყვეტილებისა და სამინისტროს მიერ გაცემული ადმინისტრაციული დაპირების საფუძველზე დევნილი ოჯახების უზრუნველყოფა საცხოვრებელი ფართით;
3. კრიტერიუმების შესაბამისად, დევნილთა გრძელვადიანი განსახლება.