დედაქალაქის საკრებულოში გუანჯოუს დელეგაციას უმასპინძლეს და ახალი ეკონომიკური, კულტურული და ტურისტული კავშირების დამყარებაზე შეთანხმდნენ.
თბილისის მუნიციპალიტეტის საკრებულოს თავმჯდომარემ გიორგი ალიბეგაშვილმა, თბილისის მერმა დავით ნარმანიამ, საკრებულოს თავმჯდომარის პირველმა მოადგილე გიორგი ტყემალაძემ, მოადგილემ გიორგი ახვლედიანმა და წარმომადგენლობითი ორგანოს დეპუტატებმა ქალაქ გუანჯოუს დელეგაციას ვიცე-მერის ზენგ კაიზენგის ხელმძღვანლობით ბიუროს დარბაზში უმასპინძლეს.
გიორგი ალიბეგაშვილი სტუმრებს მიესალა, მობრძანებისთვის მადლობა გადაუხადა და ვიზიტის მნიშვნელობაზე ისაუბრა.
,,დღევანდელი შეხვედის მიზანი ორ დამეგობრებულ ქალაქს შორის კულტურულ-ეკონომიკური ურთიერთობების გაღრმავებაა, რაც ინვესტიციების მოზიდვას და აქედან გამომდინარე, იმ პროექტების განვითარებას ითვალისწინებს, რაც ჩვენი დედაქალქისთვისაა მნიშვნელოვანი’’,-განაცხადა საკრებულოს თავმჯდომარემ.
გაუნჯოუს ვიცე-მერმა ქართულ მხარეს მასპინძლობისთვის მადლობა გადაუხადა და სამომავლო გეგმებზე ისაუბრა.
შეხვედრაზე მხარეებმა თბილისსა და ჩინეთის ერთ-ერთ უდიდეს ქალაქს შორის თანამშრომლობის შემდგომ განვითარებასა და ტურიზმის სფეროში ურთიერთობების დამყარების თაობაზეც ისაუბრეს.
როგორც თბილისის მერმა აღნიშნა, ამ ეტაპზე აქტიურად მიდის მოლაპარაკება ეკონომიკისა და მდგრადი განვითარების სამინისტროსთან თბილისსა და გუანჯოუს შორის პირდაპირი ავიარეისების განხორციელების თაობაზე.
დავით ნარმანიამ ასევე იმედი გამოთქვა, რომ ჩინეთის ერთ-ერთ უმსხვილეს ქალაქთან - გუანჯოუსთან ურთიერთობების გაღრმავება ხელს შეუწყობს მუნიციპალური მართვის სფეროში საინტერესო და ინოვაციური პროექტების განსახორციელებას.
თბილისის მუნიციპალიტეტის საკრებულოს ფრაქციის ,,ქართული ოცნება-დემოკრატიული საქართველო’’ თავმჯდომარემ, ჩუღურეთის რაიონის მაჟორიტარმა დეპუტატმა რიმა ბერაძემ შეხვედრაზე იმედი გამოთქვა, რომ ჩინეთის მხარე დაინტერესდება და შესაბამის ინვესტიციებს ჩუღურეთის რაიონის განვითარებაში ჩადებს.
ჩინეთის დელეგაციის საპასუხო ვიზიტი საკრებულოს ფრაქციის ,,თბილისელები’’ თავმჯდომარემ გიორგი მუსხელიშვილმა დადებითად შეაფასა და აღნიშნა, რომ ვიზიტის მიზანი
ქალაქებს შორის პარტნიორობის გაღრმავება და ახალი ეკონომიკური, კულტურული და ტურისტული კავშირების დამყარებაა.
დედაქალაქის საკრებულოსა და მერიის დელეგაცია საკრებულოს თავმჯდომარის გიორგი ალიბეგაშვილის და დედაქალაქის მერის დავით ნარმანიას ხელმძღვანელობით ქალაქ გუანჯოუს 2014 წლის ნოემბერში სტუმრობდნენ, სადაც თბილისსა და ჩინეთის სახალხო რესპუბლიკის ერთ-ერთ უმსხვილეს ქალაქ გუანჯოუს შორის შეთანხმება გაფორმდა.
დოკუმენტის თანახმად, ქალაქები სხვადასხვა სფეროში ითანამშრომლებენ. ხელშეკრულება ასევე ითვალისწინებს ეკონომიკური, საინვესტიციო და ტურისტული პროექტების განხორციელებას.