თბილისის მუნიციპალიტეტის საკრებულოს მაჟორიტარი დეპუტატის ზურაბ ნეფარიძის ორგანიზებით, წმიდა ბერის გაბრიელ სალოსის ხსნების დღესთან დაკავშირებით, ნავთლუღში წმინდანის სახელობის მოედნის გახსნის საზეიმო ცერემონია გაიმართა.
ღონისძიების ფარგლებში, მოედნიდან, წმინდანის სახელობის მშენებარე ტაძრამდე მსვლელობა მოეწყო, სადაც ჩატარდა ლოცვა და დაბრძანდა წმიდა ბერის ახლად დაწერილი ხატი.
მსვლელობაში საკრებულოს ისნის რაიონის მაჟორიტარ დეპუტატთან ზურაბ ნეფარიძესთან ერთად , საკრებულოს თავმჯდომარე გიორგი ალიბეგაშვილი, წარმომადგენლობითი ორგანოს დეპუტატები, თბილისის მერიის წარმომადგენლები, რაიონების გამგებლები, სასულიერო პირები და მოსახლეობა მონაწილეობდა.
გარდა ამისა, ბერი გაბრიელ სალოსის ხსენების დღესთან დაკავშირებით, ისანში სხვადასხვა კულტურული ღონისძიებები გაიმართა.
გასულ წელს თბილისის მუნიციპალიტეტის საკრებულოს გადაწყვეტილებით და სრულიად საქართველოს კათოლიკოს-პატრიარქის ილი მეორის ლოცვა -კურთხევით ისანში მდებარე გამზირს ბერი გაბრიელის სახელი ეწოდა და 2014 წლის 2 ნოემბერს ამავე რაიონში წმინდანის სახელობის ტაძრის მშენებლობას ჩაეყარა საფუძველი. ქართველი საეკლესიო მოღვაწე, არქიმანდრიტი, ბერი, ქართველი წმინდანი, ღირსი მამა გაბრიელი აღმსარებელი-სალოსი, 1929 წლის 26 აგვისტოს დაიბადა და 1995 წლის 2 ნოემბერს გარდაიცვალა.
მამა გაბრიელი საქართველოს მართლმადიდებელმა ეკლესიამ 2012 წლის 20 დეკემბერს წმინდანად შერაცხა და მისი ხსენების დღედ 2 ნოემბერი დააწესა.
