თბილისის მუნიციპალიტეტის საკრებულოს ნაძალადევის რაიონის მაჟორიტარმა დეპუტატმა დავით ჭელიძემ მოსახლეობას ერთი წლის განმავლობაში გაწეული მუშაობის შესახებ ანგარიში ჩააბარა.
წარდგენა თბილისის საკრებულოს დიმიტრი ყიფიანის სახელობის დარბაზში გაიმართა და მას საკრებულოს თავმჯდომარე გიორგი ალიბეგაშვილი, რაიონის გამგეობის, მაჟორიტარის ბიუროს წარმომადგენლები, ძველი ნაძალადევი-ლოტკინის საუბნო განყოფილების ხელმძღვანელი დიმიტრი შერაზადიშვილი და სამაჟორიტარო რაიონში მცხოვრები მოსახლეობა ესწრებოდა.
საკრებულოს ფრაქციის „ქართული ოცნება-დემოკრატიული საქართველოსთვის“ წევრის, ასევე საკრებულოს ურბანული დაგეგმარების და საქალაქო მეურნეობის და იურიდიულ საკითხთა კომისიების წევრის დავით ჭელიძის ვრცელი ანგარიში ორი ნაწილისგან შედგება. პირველი ნაწილი ფრაქციისა და კომისიების ფარგლებში დეპუტატის მიერ განხორციელებულ, მეორე კი სამაჟორიტარო რაიონში გაწეულ საქმიანობას ეხება.
ანგარიშის პირველი ნაწილის წარდგენისას, რომელიც საკრებულოში განხორციელებულ ფრაქციულ და კომისიურ საქმიანობას ასახავს, დეპუტატმა დაწვრილებით ისაუბრა მონაწილეობაზე ისეთი საკითხების განხილვაში როგორებიცაა: 2015 წლის ბიუჯეტის დაგეგმვა, განათლებისა და კულტურის დარგში პროგრამების განხორციელება, მომავალი წლის ბიუჯეტში წყალკანალიზაციის სისტემების მოწყობა-რეაბილიტაციისა და ავარიული შენობების გამაგრებისათვის გამოყოფილი თანხების გაზრდა, მერიის საქალაქო სამსახურებისა და დედაქალაქის გამგეობების კვარტალური ანგარიშების მოსმენა, „ცხელი სადილის“ (უფასო სასადილოები) პროგრამის გაუმჯობესება და სოციალურად დაუცველთა ერთიან ბაზაში დარეგისტრირების წესის გადახედვა.
ნაძალადევის რაიონის მაჟორიტარი დეპუტატის ვრცელი ანგარიშის მეორე ნაწილი სამაჟორიტარო ბიუროს საქმიანობას ეხება.
ანგარიშის მიხედვით, ბიუროს გახსნის დღიდან, მაჟორიტარმა 1926 მოქალაქე მიიღო. საანგარიშო პერიოდში, დეპუტატის სახელზე შესულია 215 განცხადება, რომელთა უმეტესობა დაკმაყოფილდა.
დეპუტატის შუამდგომლობით მოგვარდა №48 ავტობუსის და №33 მიკროავტობუსის მარშრუტის საკითხი, რამაც სირთულეები მოუხსნა რაიონის ექვსი ქუჩის მოსახლეობას. ასევე გადაიჭრა ასკურავას ქ. №1-ში მცხოვრებ 81 დევნილი ოჯახის გაზიფიცირების საკითხი.
გარდა ამისა, ანგარიშში ჩამოთვლილია უშუალოდ დავით ჭელიძის ძალისხმევით, მის სამაჟორიტარო რაიონში განხორციელებული სხვადასხვა სახის ღონისძიებები, რომლებიც ქუჩების სახელდებას, რაიონის ახალგაზრდა სპორტსმენებისთვის ტურნირების ჩასატარებლად ფინანსების მოძიებას, სპორტული ღონისძიებების ჩატარებას და სხვადასხვა დღესასწაულებზე ჩატარებულ საქველმოქმედო, კულტურულ თუ სხვა სახის აქციებს ეხება.
ანგარიშში ცალკე თავი ეძღვნება რაიონის სკვერებისა და სპორტული მოედნების მოწყობისა და სხვა ინფრასტრუქტურული ობიექტების კეთილმოწყობის, ქუჩების კაპიტალური რეაბილიტაციისა და ბაგა-ბაღების მშენებლობის საკითხებს. არსებული მონაცემებით რაიონში ამჟამად ორი ახალი საბავშვო ბაღის მშენებლობა მიმდინარეობს.
ანგარიშის თანახმად საანგარიშო პერიოდში, რაიონში კაპიტალური რეაბილიტაცია ჩაუტარდა ექვს ქუჩას და სამუშაოები ჯამში 27 247 კვ/მ-ზე განხორციელდა. ამჟამად სარეაბილიტაციო სამუშაოები მიმდინარეობს 6 ქუჩაზე, რომლებიც 21 949 კვ-მ მოიცავს. გარდა ამისა, მიმდინარე წელს სარეაბილიტაციო სამუშაოები დაიწყება რაიონის კიდევ 3 ქუჩაზე. ჩამონათვალში ასევე შესულია მონაცემები საყრდენი კედლებისა და კიბეების მოწყობის შესახებ.
რაც შეეხება, სპორტული მოედნების რეაბილიტაციას, მიმდინარე წელს, ანგარიშის მიხედვით რაიონში ორი სპორტული მოედნის რეაბილიტაცია ჩატარდა და მესამე მოედნის სარეაბილიტაციო სამუშაოები უახლოეს დღეებში დაიწყება.
ანგარიში მიხედვით, დეპუტატის ჩართულობით და ნაძალადევის რაიონის გამგეობის თანადაფინანსებული პროექტების კუთხით, ძველი ნაძალადევი-ლოტკინის სამაჟორიტარო ოლქში შესრულებულია სარემონტო სამუშაოები 29 მისამართზე.
ანგარიშის დასკვნითი ნაწილი, მომდევნო წელს რაიონში დაგეგმილი ღონისძიებების ჩამონათვალს ეხება, რომლის მიხედვით 2016 წელს რაიონის 28 ქუჩის, 12 სპორტული მოედნის, 17 სკვერის რეაბილიტაცია და კონკრეტულ მისამართებზე გამაგრებითი სამუშაოების ჩატარება იგეგმება.