შერიგებისა და სამოქალაქო თანასწორობის საკითხებში სახელმწიფო მინისტრის, პაატა ზაქარეიშვილის განცხადებით, ევროინტეგრაციის მოლოდინი აფხაზებსა და ოსებსაც აქვთ და როგორც კი, საქართველო ვიზა-ლიბერალიზაციას მიიღებს, ქართულმა მხარემ პროპაგანდა უნდა დაიწყოს.
პარლამენტის ტერიტორიული მთლიანობის აღდგენის დროებითი კომისიის სხდომაზე, ზაქარეიშვილმა ოკუპირებულ ტერიტორიებზე მცხოვრები ადამიანების ევროპულ განწყობებზე ისაუბრა, რომელსაც დეპუტატმა, ანი მიროტაძემ კითხვით მიმართა, რამდენად ელოდებიან ევროკავშირს ცხინვალსა და სოხუმში.
მინისტრის განცხადებით, ვინც ოკუპირებულ ტერიტორიებზე აქტიური მოსახლეობაა, ისინი ფიქრობენ, რომ ევროკავშირი საინტერესოა ალტერნატივაა.
ზაქარეიშვილის თქმით, საოკუპაციო ხაზის გასწვრივ გავლებული მავთულხლართები პროვლემებს ისევ იქ მცხოვრებ ადამიანებს უქმნის.
მინისტრის ინფორმაციით, ე.წ. ცხინვალის ხელმძღვანელობა ე.წ. საზღვრის დარღვევის სტატისტიკას ხშირად აქვეყნებს და საოკუპაციო ხაზის დარღვეული ათი შემთხვევიდან შვიდ შემთხვევაში დაჯარიმებული ცხინვალელია.
„ასანთი და სიგარეტიც კი აქეთ იყიდება. დასამალი არ არის, რომ მათ ლარის შენახვა ურჩევნიათ. ცხინვალში მცხოვრები ქალების უმეტესობა ქართულ ენაზე გახმოვანებულ სერიალებს უყურებს. ყველაფერი უნდა გავეკეთოთ, რომ იქ ქართული მაუწყელობა ვრცელდებოდეს. აშკარად ვახერხებთ იმას, რომ ბევრ მათგანს ქართული მაუწყებლობა აუღუდგა. თუკი აფხაზეთში ადამიანი თვალს ახელს და ზღვას ხედავს, ცხინვალში მცხოვრები მთელ საქართველოს ხედავს. ყველაფერს ვაკეთებთ, რომ მათი არჩევანი საქართველო იყოს. ის რაც საქართველოსთვის მისაღებია და ომს არ გამოიწვევს, მათთვისაც მისაღებია. ბევრ მათგანს ვხვდები და ისინი ჩვენს მიმართ კეთილგანწყობილები არიან. სამი წელი რაც გავიარეთ, იმის საფუძველს გვაძლევს, რომ სწორი ნაბიჯებით მივდივართ, მაგრამ ეს არ ნიშნავს, რომ ფინალი ახლოსაა“, - განაცხადა მინისტრმა.
ზაქარეიშვილის ინფორმაციით, ოკუპირებულ ტერიტორიებზე მცხოვრები პირები ქართული ჯანდაცვით ხშირად სარგებლობენ.
„აფხაზეთიდან ერთ-ერთი ძალიან დიდი ფიგურა გადმოიყვანეს, რომელიც სიკვდილს გადავარჩინეთ და ამან ფაქტმა ძალიან იმუშავა“, - დასძინა ზაქარეიშვილმა.
