თბილისში დევნილთათვის ბინების გადანაწილებისთვის გამოცხადებული დამატებითი კონკურსი დასრულდა. აღნიშნული კონკურსის საჭიროების გამო, კიდევ ერთხელ გადაიდო ნგრევად და სიცოცხლისათვის (ან ჯანმრთელობისათვის) მომეტებული საფრთხის შემცველი ობიექტებიდან დევნილების გაყვანა. „ოლიმპიური სოფელსა “და მენაშენეებისგან გამოსყიდულ 27 ბინაზე, აპლიკაციების დამატებით შევსება, 21 ოქტომბერს დაიწყო და 31 ოქტომბერს დასრულდა.
ახალგაზრდული ოლიმპიადის დასრულების შემდეგ, ოლიმპიური სოფლის კომპლექსში რვა კორპუსის დევნილებისთვის საჩუქრად დაუყოვნებლივ გადაცემის შესახებ განცხადება პრემიერ-მინისტრმა, ჯერ კიდევ ახალგაზრდული ოლიმპიადის დაწყებამდე გააკეთა.
ოლიმპიადის დასრულების შემდეგ კი დევნილთა მინისტრმა განაცხადა, რომ დევნილები "ოლიმპიურ სოფელში" ბინების მიღებას ოქტომბრის ბოლომდე შეძლებდნენ. სოზარ სუბარის განმარტებით, ოლიმპიური სოფელი დევნილების ჩასახლებისთვის, წესით სექტემბერში უნდა ჩაბარებულიყო, თუმცა მისი თქმით, სამშენებლო კომპანიამ გარკვეული დრო ითხოვა.
ბინების მიღების პრეტედენტი დევნილი ოჯახების სიის დამოქვეყნება შემდეგში, 5-10 ოქტომბრისთვის იქნა დაანონსებული. თუმცა, სოზარ სუბარის უწყების ინფორმაციით, ახალი გარემოებების აღმოჩენის გამო, პროცესი ისევ გადაიდო. ახალი გარემოება კი 27 ბინაზე დამატებითი კონკურსის გამოცხადების საჭიროება გახდა. სამინისტროს ინფორმაციით, კონკურსში მონაწილეობა მხოლოდ 7-8 წევრისგან შემდგარი ოჯახებისთვის გამოცხადდა.
შგახსენებთ, საუბარია სულ 561 დევნილი ოჯახისთვის დედაქალაქში ბინების გადაცემაზე უახლოეს დღეებში. დამატებითი კონკურსის გამოცხადებამდე შერჩეული იყო 534 დევნილი ოჯახი. მათ შორის, თბილისის ზღვაზე, „ჰუალინგ ჯგუფისგან“ 330, ხოლო ქართველი მენაშენეებისგან გამოსყიდულ კორპუსებში, 204 დევნილი ოჯახი უნდა შეასახლონ.
სამინისტროს ინფორმაციით, დევნილთა გრძელვადიანი განსახლების პროცესი სამი მიმართულებით მიმდინარეობს:
1. ნგრევად და სიცოცხლისათვის ან ჯანმრთელობისათვის მომეტებული საფრთხის შემცველი ობიექტებიდან დევნილი ოჯახების გაყვანა;
2. სასამართლოს ან ზემდგომი ადმინისტრაციული ორგანოს გადაწყვეტილებისა და სამინისტროს მიერ გაცემული ადმინისტრაციული დაპირების საფუძველზე დევნილი ოჯახების უზრუნველყოფა საცხოვრებელი ფართით;
3. კრიტერიუმების შესაბამისად, დევნილთა გრძელვადიანი განსახლება.