2008 წლის აგვისტოს ომსა და ISAF-ის მისიაში დაღუპული სამხედრო მოსამსახურეების შვილების მონაწილეობით ინგლისური ენის შემსწავლელ ცენტრში „ბრიტანული კუთხე“ ღონისძიება გაიმართა. ბავშვებმა ნატოსა და ევროკავშირის შესახებ საინფორმაციო ცენტრს იუბილე ინგლისურ ენაზე გამართული წარმოდგენით „Halloween“ მიულოცეს.
ღონისძიება ნატოს კვირეულის ფარგლებში გაიმართა. წარმოდგენის დასრულების შემდეგ, ბავშვებს სიტყვით მიმართეს თავდაცვის მინისტრის მრჩეველმა მაია ქავთარაძემ, დიდი ბრიტანეთისა და ჩრდილოეთ ირლანდიის გაერთიანებული სამეფოს ელჩმა საქართველოში ალექსანდრა ჰოლ ჰოლმა და ნატოსა და ევროკავშირის შესახებ საინფორმაციო ცენტრის დირექტორმა ელენე გოცაძემ. მათ პატარებს სახალისო წარმოდგენისთვის მადლობა გადაუხადეს, მხარდაჭერა აღუთქვეს და დაღუპული სამხედროების მიერ გაღებული მსხვერპლის მნიშვნელობაზე კიდევ ერთხელ გაამახვილეს ყურადღება.
„თავს ნამდვილად პრივილეგირებულად ვგრძნობ, რადგან დიდი ბრიტანეთის საელჩოს შეუძლია იმ დაღუპული სამხედრო მოსამსახურეების ოჯახებს გაუწიოს მხარდაჭერა, რომლებმაც სამშობლოს ერთიანობისთვის, მსოფლიო მშვიდობისა და უსაფრთხოებისთვის გაწირეს თავი. ნატო და ჩემი ქვეყანა უდიდეს მადლიერებას გამოხატავენ საქართველოს მიერ შეტანილი წვლილის მიმართ მსოფლიო უსაფრთხოების საქმეში,“ - აღნიშნა დიდი ბრიტანეთის ელჩმა ალექსანდრა ჰოლ ჰოლმა.
დაღუპული სამხედრო მოსამსახურეების შვილები „ბრიტანულ კუთხეში“ ინგლისურ ენას სექტემბრიდან ეუფლებიან. ბავშვები 10-კვირიან სასწავლო პროგრამას დიდი ბრიტანეთის საელჩოს დაფინანსებითა და ნატოსა და ევროკავშირის შესახებ საინფორმაციო ცენტრის ინიციატივით გადიან.
