დედაქალაქის მუნიციპალიტეტის საკრებულოს გლდანის რაიონის ავჭალის მაჟორიტარმა დეპუტატმა კობა კობალაძემ მოსახლეობას გაწეული საქმიანობის შესახებ ანგარიში პრეზენტაციის სახით წარუდგინა.
მისი განცხადებით, დეპუტატის ბიურომ ფუნქციონირება 2014 წლის აგვისტოში დაიწყო და მოქალაქეთა მიღებას ყოველ დღე აწარმოებს.
ამასთან, ბიუროს ხელმძღვანელი მონიტორინგის წარმოების მიზნით, სისტემატურად ესწრება მოსახლეობასთან შეხვედრებს, რომლებიც ყოველ პარასკევს გლდანის გამგეობაში იმართება.
ბიუროს თანამშრომლები ორგანიზებას დეპუტატის საჯარო შეხვედრებსაც უწევენ , აწარმოებენ მოქალაქეთა მიღებას დეპუტატის არყოფნის პერიოდში, გასცემენ კონსულტაციებს შესაძლებლობისა და კომპეტენციის ფარგლებში, აანალიზებენ შემოსული განცხადებების არსს და ახდენენ სათანადო რეაგირებას.
„ბიუროს გახსნის პირველივე დღიდან, შემდგომი რეაგირების მიზნით, ბიუროს თანამშრომლებმა ჩემი დავალებით შეისწავლეს და პრობლემატიკის მიხედვით დაახარისხეს ის წერილები, რომლებიც წინასაარჩევნო კამპანიის ფარგლებში მოსახლეობამ გადმომცა. აღნიშნული წერილებიდან ისეთი ძირითადი პრობლემები გამოიკვეთა, როგორიცაა სოციალური დაცვა, მედიკამენტებისა და სამედიცინო მომსახურების დაფინასება, საგზაო ინფრასტრუქტურის, გარე განათების, სანიაღვრე და წყალგაყვანილობის სისტემების მოწესრიგება , ასევე მიწის ლეგალიზება და სხვადასხვა ცალკეული თემების გადაწყვეტა’’,- აღნიშნა კობა კობალაძემ.
დეპუტატმა ასევე ისეთი მნიშვნელოვანი მიმართულებების გადაჭრის აუცილებლობაზეც ისაუბრა, როგორიცაა საქალაქო ტრანსპორტი და გამრიცხველიანების მოთხოვნების დაკმაყოფილება, ასევე კულტურული, სპორტული თუ საგანმანათლებლო ღონისძიებების დაფინანსება.
დღესვე, შეხვედრაზე კობა კობალაძემ მოსახლეობას ბიუროში შესულ განცხადებებზე რეაგირების სტატისტიკაც გააცნო, რომლის თანახმად, ბიუროში სულ შესულია 2500-ზე მეტი განცხადება, საიდანაც უმეტესობა დაკმაყოფილდა.
აღნიშნული სტატისტიკა თემატიკის მიხედვით შემდეგნაირად გამოიყურება: სამედიცინო მომსახურების/მედიკამენტების დაფინანსება, რეკომენდაცია დასაქმების/სამსახურში აღდგენის თაობაზე, კეთილმოწყობის სამუშაოები, სამშენებლო მასალებით და მყარი საწვავით(შეშით) უზრუნველყოფა, გამრიცხველიანება, სოციალურად დაუცველის სტატუსის მინიჭება/აღდგენა, საცხოვრებელი ფართის/ბინის ქირით უზრუნველყოფა, მიწის ლეგალიზება, კომუნალური დავალიანების ჩამოწერა/განწილვადება, სწავლის დაფინასება.
კერძოდ, 2015 წლის იანვრიდან დღემდე გაიხსნა და რეაბილიტაცია ჩაუტარდა სპორტულ მოედნებს; მოეწყო სკვერები, მოსასვენებელი პავილიონები და ასამდე საბაღე სკამი; კონკრეტულ მისამართებზე განხორციელდა საკანალიზაციო და წყალმომარაგების ქსელების მონტაჟი; თბილისის ზოგიერთ შემოერთებულ ტერიტორიაზე შეიცვალა მაგისტრალური და სასმელი წყლის მილები;
ასევე, მოეწყო შუქნიშნები, მოძრაობის ხელოვნური შემაფერხებელი ბარიერები, გზისპირა ჯებირები და დამონტაჟდა საგზაო ნიშნები.
დეპუტატის შუამდგომლობით, დაფინანსდა ავჭალის რაგბის გუნდი „წიქარა“.
როგორც კობა კობალაძემ აღნიშნა, შემოსული განცხადებებიდან ზოგიერთი, რომლებიც სხვა ორგანოთა უფლება-მოსილების ფარგლებში შედიოდა, შესაბამის უწყებებში გადაიგზავნა. „იქიდან გამომდინარე, რომ ჩემი შუამდგომლობა გარკვეულ ვადებთან არის დაკავშირებული და მოქალაქეები პირადად მიმართავდნენ სხვადასხვა უწყებებს, მუდმივად ვახორციელებ ასეთი განცხადებებისა და წერილების მონიტორინგს, რის საფუძველზეც ჩემი ზეპირი შუამდგომლობის ფორმატშიც არაერთი განცხადება დაკმაყოფილდა“-განმარტა დეპუტატმა.
თუმცა, აღსანიშნავია ისიც, რომ გარდა სხვადასხვა უწყებებთან შუამდგომლობისა, დეპუტატმა პირადი სახსრებით ერთჯერადი მატერიალური დახმარება 34 სოციალურად დაუცველ, უკიდურეს სიღარიბეში მყოფ ოჯახსაც გაუწია.
კობა კობალაძის ინიციატივით, მაჟორიტარულ ოლქში სხვადასხვა დროს მიწვეულ იქნენ თბილისის მერიის, კერძოდ, ზედამხედველობის, სპორტისა და განათლების, ეკოლოგიისა და გამწვანების, ტრანსპორტის, კეთილმოწყობის საქალაქო სამსახურების წარმომადგენლები.
ბიურო ასევე აქტიურად თანამშრომლობს რაიონის გამგეობასთან, კომპანიებთან „ჯორჯიან უოთერ ენდ ფაუერი“ და „თბილსერვის ჯგუფი“.
მისივე ინიციატივით, ხშირად იმართება აღნიშნული უწყებების წარმომადგენელთა შეხვედრები მოსახლეობასთან, რაც ამ მიმართულებებით არსებული პრობლემების ადგილზე შესწავლისა და სწრაფი რეაგირების საშუალებას იძლევა.
ავჭალის მუნიციპალიტეტს 8 სკოლა, 8 ბაგა-ბაღი, 4 პოლიკლინიკა და 2 უფასო სასადილო ემსახურება.
შეხვედრა გლდანის რაიონის გამგეობაში გაიმართა, რომელსაც ავჭალის მოსახლეობის გარდა, საკრებულოს დიღმის მასივის რაიონის მაჟორიტარი დეპუტატი თარაშ შურღაია და გლდანის რაიონის გამგებელი ბესიკ ქარცივაძე ესწრებოდნენ.