დედაქალაქის მუნიციპალიტეტის საკრებულოს სამგორის რაიონის მესამე მასივის მაჟორიტარმა დეპუტატმა ლევან დარახველიძემ მოსახლეობას ერთი წლის განმავლობაში გაწეული საქმიანობის შესახებ ანგარიში წარუდგინა.
პრეზენტაცია სამაჟორიტარო ბიუროში გაიმართა და მას საკრებულოს თავმჯდომარის პირველი მოადგილე გიორგი ტყემალაძე, დეპუტატები იოსებ მანჯავიძე და ვლადიმერ ძნელაძე, რაიონის გამგებელი მამუკა ჩოქური, რაიონის მუნიციპალიტეტის თავმჯდომარე გიორგი დოხტურიშვილი, ბიუროს თანამშრომლები და რაიონის მოსახლეობა ესწრებოდა.
გაწეული საქმიანობის პრეზენტაცია ლევან დარახველიძემ სამაჟორიტარო ბიუროს მიერ გაწეული საქმიანობის წარდგენით დაიწყო. ისაუბრა მოქალაქეებთან გამართული შეხვედრების, ბიუროში შემოსული განცხადებების, წერილების და გაწეული შუამდგომლობების შესახებ.
ყურადღება გაამახვილა ჯანდაცვისა და სოციალური, განათლების და კულტურის, სპორტისა და ახალგაზრდობის, საზოგადოებრივი საქმიანობისა და საქველმოქმედო მიმართულებით განხორციელებულ ღონისძიებებზე.
ანგარიშის თანახმად, მაჟორიტარის ბიუროში, საანგარიშო პერიოდში 1500-მდე მოქალაქე მიიღეს. შესულია 500-მდე განცხადება, წერილობითი შუამდგომლობა გაეწია 250-მდე მოქალაქეს. ანგარიშის მიხედვით, დღეისათვის განცხადებების 70 % დაკმაყოფილებულია.
არსებული მონაცემებით, ჯანდაცვის მიმართულებით, დეპუტატის შუამდგომლობით მედიკამენტები 60-მდე მოქალაქეს დაუფინანსდა, სამედიცინო გამოკვლევები და ოპერაციები 20 -მდე მოქალაქეს, ხოლო ერთჯერადი ფინანსური დახმარება 80-მდე მოქალაქეს აღმოუჩინეს.
წარდგენისას დეპუტატმა აღნიშნა, რომ მაჟორიტარის შუამდგომლობის დოკუმენტების გარეშე, დაჩქარებულად კეთდება გადაუდებელი სამედიცინო საჭიროების მქონე პირების, იშვიათი დაავადებების, აუტისტური სპექტრის მქონე ბავშვების და შშმ პირების საბუთები.
ლევან დარახველიძემ წარდგენისას ხაზგასმით აღნიშნა, რომ თითოეული მოქალაქის შემთხვევის განხილვა სოციალურ აგენტებთან ინდივიდუალურად ხდება და საჭიროების შემთხვევაში, მაჟორიტარი მათ მომსახურების სააგენტოსთან შუამდგომლობს.
„ამ მხრივ შემოსულია 15 მოქალაქის განცხადება, რომელთაგან დადებითად გადაწყდა 4. სოციალური სტატუსის მინიჭებასთან დაკავშირებით11 შუამდგომლობა კი განხილვის სტადიაშია“, - განაცხადა დარახველიძემ.
გარდა ამისა, ანგარიშში საუბარია მაჟორიტარი დეპუტატის ინიციატივით და არასამთავრობო ორგანიზაციებთან თანამშრომლობის შედეგად განხორციელებულ საზოგადოებრივ და საქველმოქმედო აქციებზე, რომელთა ფარგლებშიც სამაჟორიტარო ბიურომ რაიონში რამდენიმე საზოგადოებრივი აქცია ჩაატარა და 4 მოქალაქე სამედიცინო ეტლით უზრუნველყო.
ანგარიშში ასევე აღნიშნულია, რომ დეპუტატი და ბიუროს თანამშრომლები აქტიურად იყვნენ ჩართული 13 ივნისის სტიქიის შედეგების ლიკვიდაციის სამუშაოებში და ამ მიმართულებით მათ რამდენიმე ღონისძიება განახორციელეს.
ანგარიშის წადგენისას, მაჟორიტარმა დეპუტატმა ასევე დაწვრილებით ისაუბრა ინფრასტრუქტურული მიმართულებით განხორციელებულ საქმიანობაზე და იმ გამაგრებითი სამუშაოების სტატისტიკური მონაცემები წარადგინა, რომლებიც საანგარიშო პერიოდში რაიონში განხორციელდა.
ანგარიშში ცალკეა გამოყოფილი ბინათმესაკუთრეთა ამხანაგობების პროექტის განხორციელებასთან დაკავშირებული მონაცემები, რომელთა მიხედვითაც
კორპუსის ამხანაგობების ფარგლებში სამუშაოები შემდეგი მიმართულებებებით შესრულდა: სახურავების გადახურვა, წყალსაწრეტი მილების შეკეთება, წყალგაყვანილობა/კანალიზაციის რეაბილიტაცია, ლიფტების შეკეთება, სართულშუა ნაპრალების რეაბილიტაცია, სენსორული განათება, სადარბაზოების შიდა რემონტი, სადარბაზოს კარის შეკეთება, სადარბაზოს კიბეების რეაბილიტაცია, სადარბაზოს ქუდის შეკეთება და წითელი ხაზი.
ანგარიშში ასევე მოყვანილია მონაცემები რაიონში, საანგარიშო წლის განმავლობაში შესრულებულ საგზაო ინფრასტრუქტურის, ცენტრალური წყალ-კანალიზაციის სისტემის, სკვერებისა და სპორტული მოედნების, განხორციელებულ და მიმდინარე რეაბილიტაციო სამუშაოებზე.
პრეზენტაციაზე, ლევან დარახველიძემ სამაჟორიტარო რაიონში განხორციელებული საქმიანობის ანგარიშის გარდა, მოსახლეობას ანგარიში, თბილისის მუნიციპალიტეტის საკრებულოში მის მიერ განხორციელებული საქმიანობის შესახებაც ჩააბარა, სადაც მაჟორიტარი დეპუტატი არის ფრაქციის „ქართული ოცნება-მრეწველები“ და საკრებულოს ქონების მართვისა და საფინანსო საბიუჯეტო კომისიის წევრი და საკრებულოს ეკონომიკური განვითარების, საინვესტიციო პოლიტიკისა და საერთაშორისო ურთიერთობების კომისიის თავმჯდომარის თანამდებობას იკავებს.
