დედაქალაქის მუნიციპალიტეტის საკრებულოს სპორტისა და ახალგაზრდულ საქმეთა კომისიის თავმჯდომარე, მუხიანის მაჟორიტარი დეპუტატი ქეთევან ჯოხაძე საკუთარი სამაჟორიტარო ოლქის მოსახლეობას შეხვდა და 2015 წელს გაწეული სამუშაოების თაობაზე ანგარიში ჩააბარა.
როგორც დეპუტატმა აღნიშნა, ბიუროს ძირითადად ის მოქალაქეები მიმართავენ, რომლებიც ჯანდაცვისა და სოციალური კუთხით ითხოვენ დახმარებას.
ქეთევან ჯოხაძის მიერ წარმოდგენილი სტატისტიკის მიხედვით, დაკმაყოფილებულია ყველა განცხადება, რომელიც ოპერაციების დაფინანსებას მოიცავდა. მაჟორიტარის შუამდგომლობითა და შესაბამისი სამსახურების დახმარებით, ასევე განხორციელდა ათეულობით მოქალაქის მკურნალობის ხარჯების დაფარვა და მედიკამენტებით უზრუნველყოფა.
მუხიანში მცხოვრები 6 ოჯახი დაკმაყოფილდა ბინის ქირით, 4 მოქალაქეს კი გადაუნაწილდა კომუნალური გადასახადის დავალიანება.
წელს ასევე მოგვარდა იძულებით გადაადგილებულ პირთა მრავალწლიანი პრობლემა და ყოფილი სახლმართველობის შენობაში მცხოვრებ დევნილებს უპრობლემოდ მიეწოდებათ ელექტროენერგია და ბუნებრივი აირი.
ქეთევან ჯოხაძის თანამონაწილეობით რაიონში გაიხსნა ახალი სკვერები, დაიგო გზის საფარი, გამაგრდა რამდენიმე ავარიული კორპუსი, მოეწყო გამწვანების აქციები და რეაბილიტაცია ჩაუტარდა სპორტულ მოედნებს. სოციალურად დაუცველი ოჯახების შვილები სარგებლობენ გლდანის საცურაო აუზის აბონემენტით, ასევე უფასოდ ჩატარდა ხერხემლის გამოკვლევა და მოეწყო აქცია, რომელიც ლეიკემიით დაავადებული ბავშვების დახმარებას ისახავდა მიზნად.
მაჟორიტარმა დეპუტატმა მუხიანი 2 დასახლებაში არსებულ პრობლემებზეც ისაუბრა და აღნიშნა, რომ მათ აღმოსაფხვრელად უკვე გადადგმულია პირველი ნაბიჯები. 4 ათას ოჯახზე მეტს მოუგვარდა სასმელი წყლის პრობლემა, ასევე ნაწილობრივ მოხდა ბუნებრივი აირის შეყვანა. რაც შეეხება საკანალიზაციო ქსელისა და სანიაღვრე სისტემის მოწესრიგებას, ქეთევან ჯოხაძის განცხადებით, აღნიშნულ საკითხთან დაკავშირებით მიმდინარეობს მოლაპარაკებები კომპანია ,,GWP’’-სთან.
დეპუტატმა, სპორტისა და ახალგაზრდულ საქმეთა კომისიის პრიორიტეტებზეც ისაუბრა და მოსახლეობას საკუთარი წინადადებებითა და შუამდგომლობებით განხორციელებული პროექტები გააცნო.
მისი თქმით, საკრებულომ დაამტკიცა პროექტი, რომლის მიხედვითაც სპორტის სფეროს საწარმოების ქონების საშუალო წლიურმა საბალანსო ღირებულებამ 2017 წლის 1 იანვრამდე 0,001%-მდე დაიწია.
ქეთევან ჯოხაძემ დედაქალაქში ჩატარებული ზაფხულის ახალგაზრდული ოლიმპიური ფესტივალის ,,თბილისი- 2015“ და უეფას სუპერთასის გათამაშების მნიშვნელობაზეც ისაუბრა და მოსახლეობას აღნიშნული ღონისძიებების ფარგლებში განხორციელებული, საერთაშორისო სტანდარტების დარბაზებისა და კომპლექსების მშენებლობების ნუსხა გააცნო.
მისივე თქმით, კომისიამ იმსჯელა საქართველოს მთავრობის დადგენილებაზე, რომელიც ჭადრაკის განვითარების პროგრამას ისახავს მიზნად.
ანგარიშის წარდგენის შემდეგ, შეხვედრა სიტყვა-პასუხის რეჟიმში წარიმართა. დეპუტატმა მოსახლეობას თითოეულ კითხვაზე კონკრეტული პასუხი გასცა და მომავალი წლის ბიუჯეტის პრიორიტეტები გააცნო.
შეხვედრას თბილისის მუნიციპალიტეტის საკრებულოს ფრაქცია ,,ქართული ოცნება - კონსერვატორების“ თავმჯდომარე ნინო გოგუაძე და ამავე ფრაქციის წევრი დავით უთმელიძე, ასევე გლდანის რაიონის გამგებელი ბესიკ ქარცივაძე ესწრებოდნენ.
