დედაქალაქის მუნიციპალიტეტის საკრებულოს ვარკეთილი III-ის მაჟორიტარმა დეპუტატმა ია მაკასარაშვილმა მოსახლეობას გაწეული საქმიანობის შესახებ ანგარიში წარუდგინა.
მისი განცხადებით, დეპუტატის ბიურომ ფუნქციონირება 2014 წლის აგვისტოში დაიწყო და ამ ერთი წლის მანძილზე აქტიურად იყო ჩართული ვარკეთილის მოსახლეობის პრობლემების გადაჭრის პროცესში, რასაც სხვადასხვა სოციალური ჯგუფების არაერთგვაროვანი ხასიათის წერილებსა და განცხადებებზე მყისიერი რეაგირება ახლდა თან.
„მე, როგორც ამ რაიონის მაჟორიტარ დეპუტატს მაქვს ნაკისრი ვალდებულება, რომ ვარკეთილის მოსახლეობას ჩემს მიერ გაწეული საქმიანობის ანგარიში ჩავაბარო და მოვისმინო ის პრობლემები, შენიშვნები და წინადადებები, რომლებიც მათი მხრიდან გამოითქმება. ჩემს უპირველეს ამოცანას მათზე ზრუნვა და არსებული პრობლემების გადაჭრა წარმოადგენს.
თუმცა, აქვე მინდა აღვნიშნო, რომ გამოწვევები, რომელთა წინაშეც მე აღმოვჩნდი, საკმაოდ რთული და არაერთგვაროვანი ხასიათის იყო და მათი მოგვარების მიზნით, მე არა მხოლოდ ბიუროში, არამედ საკრებულოშიც უწყვეტ რეჟიმში ვაგრძელებ მუშაობას“,-განაცხადა ია მაკასარაშვილმა.
როგორც დეპუტატმა აღნიშნა, სამუშაო პროცესმა ცხადყო, რომ მოქალაქეთა პრობლემები ძირითადად დასაქმებას, მედიკამენტებით დახმარებას, ოპერაციებისა და სხვა სამედიცინო მომსახურებების დაფინანსებას, ავარიული შენობების რეაბილიტაციას, სხვადასხვა ინფრასტრუქტურული საკითხების გადაჭრას და სხვა სოციალური საკითხების მოგვარებას ეხება.
მისივე თქმით, პრობლემების უკეთ გაცნობისა და მომავალი წლის ბიუჯეტის უკეთ დაგეგმვის მიზნით, დეპუტატი წლის განმავლობაში არა ერთხელ შეხვდა ბინათმესაკუთრეთა ამხანაგობის თავმჯდომარეებს.
ბიუროს შუამდგომლობითა და რაიონის გამგეობის დახმარებით რაიონში მოგვარდა სხვადასხვა ინფრასტრუქტურული, კეთილმოწყობის, ჯანდაცვის, სოციალური და სხვა სახის პრობლემები.
ია მაკასარაშვილი ბიუროს წარმომადგენლებთან ერთად, ასევე სხვადასხვა კულტურულ, საგანმანათლებლო და სპორტულ ღონისძიებებსა და საქველმოქმედო აქციებში იყო ჩართული.
შეხვედრას, მოწვეული სტუმრების გარდა, სამგორის რაიონის გამგეობის წარმომადგენლები ესწრებოდნენ.
