თბილისის მერი დავით ნარმანია ჩეხეთის რესპუბლიკის ეროვნულ დღესასწაულთან დაკავშირებით გამართულ საზეიმო ღონისძიებას დაესწრო და ჩეხი მუსიკოსის, ქართული ფოლკლორის ლოტბარის - იოსეფ რატილის (ნავრატილის) ხსოვნის პატივსაცემად, თბილისში, კიევის ქუჩა #1-ში, სიმბოლურად, მემორიალური დაფა გახსნა.
„ჩეხეთის რესპუბლიკის ეროვნულ დღესასწაულთან დაკავშირებით, დღეს, სიმბოლურად გავხსენით იმ ადამიანის სახელობის მემორიალი, რომელმაც დიდი წვლილი შეიტანა ეროვნული საგანძურის - ქართული ხალხური სიმღერის შენარჩუნებაში და საკუთარი ცხოვრება ქართულ კულტურას დაუკავშირა. სწორედ ამიტომ, მნიშვნელოვანია, რომ დღეს პატივი მივაგეთ მის ღვაწლს, კიდევ ერთხელ გავიხსენეთ და დავაფასეთ იოსეფ რატილის შემოქმედება“, - განაცხადა თბილისის მერმა დავით ნარმანიამ.
ღონისძიებას ჩეხეთის რესპუბლიკის საგანგებო და სრულუფლებიანი ელჩი საქართველოში ტომაშ პერნიცკი და საკრებულოს თავმჯდომარე გიორგი ალიბეგაშვილიც ესწრებოდნენ.