ჟურნალისტი ნინო ჯღარკავა გადაცემა „განსხვავებული აქცენტების“ შეჩერების მოთხოვნით სასამართლოს მიმართავს და ასევე მოითხოვს, მორალური ზიანის ანაზღაურებას 100 000 დოლარის ოდენობით, - ამის შესახებ ჟურნალისტმა აღნიშნულ გადაცემასთან დაკავშირებით გამართულ ბრიფინგზე განაცხადა.
რუსთავი 2-ის ეთერში დღეისათვის დაანონსებულია ნინო ჯღარკავასა და ლადო ბედუკაძის მიმოწერის გამოქვეყნება, რასაც ჟურნალისტი სიყალბეს უწოდებს.
„ვერაფრით წარმოვიდგენდი, რომ მოვაწყობდი ბრიფინგს ჩემი კოლეგის წინააღმდეგ. სამართალდამცავებთან მაქვს კონტაქტი და აღიძვრება სისხლის სამართლის საქმე. ანონსში მითითებულია ჩემი და ბედუკაძის მიმოწერა, თითქოს რაღაც თანხა გადავურიცხე მის მეუღლეს და მოკლედ, მოლაპარაკება არის აბსურდი. ეს არის ფოტოშოპი, ფეიკია ამ ფეიკს ადასტურებს ის, რომ მე მაცვია მაისური, რომელიც სტამბულში შევიძინე ესეც ადასტურებს, რომ ფეიკია. მაისური სტამბულში შევიძინე, იქ ვიყიდე და როგორ დავწერდი, რომ სტამბულში გავუგზავნიდი ფულს ბედუკაძის მეუღლეს? ეს ფეიკი შარშან ზაზა გაბედავამ მომაწოდა. ასევე, 2014 წელს ლაშა ბერულავამ და მან მიაწოდა ეკა კვესიტაძეს“, - განაცხადა ნინო ჯღარკავამ.
მისივე თქმით, ის ამ ამბავთან იმ მიზეზით დააკავშირეს, რომ არის თამაზაშვილის და ღარიბაშვილის ოჯახის მეგობარი.
გადაცემა „განსხვავებულ აქცენტებში“ დღეს ციხის სკანდალური კადრების შესახებ იქნება საუბარი.
