ტელეკომპანია „მაესტრო“ განცხადებას ავრცელებს, რომელსაც გთავაზობთ უცვლელად:
”ბოლო პერიოდში გამოიკვეთა ტენდენცია, რომ შპს „სტუდია მაესტროს“ ერთ-ერთი პარტნიორი და მისი წარმომადგენელი, იმის მიუხედავად, რომ არ წარმოადგენენ სამართლებრივ მხარეს მიმდინარე გადახდისუუნარობის საქმეში, საეჭვოდ გახშირებული ბრიფინგებით და სხვა აქტივობებით მიზანმიმართულად ახდენენ ნეგატიურ გავლენას პროცესებზე.
კერძოდ, აშკარად არაუფლებამოსილი პირების მიერ, დროის გაჭიანურების მიზნით, ხდება საჩივრების წარდგენა, ასევე ინფორმაციის და დოკუმენტაციის გამოთხოვა და მიღება.
ჩნდება ეჭვი, რომ საქმე გვაქვს დამოუკიდებელი ტელეკომპანიის საქმიანობის შეფერხების მიზანმიმართულ მცდელობასთან.
მოვუწოდებთ სასამართლოს, ასევე, ყველა სახელმწიფო სტრუქტურას და სახელმწიფო მოხელეს, ნებსით თუ უნებლიედ არ მოექცნენ არასამართლებრივი გავლენის ქვეშ.
ვფიქრობთ, დამოუკიდებელი ტელეკომპანიის ფუნქციონირება არის სწორედ ის სიკეთე, რომლის დაცვაც სწორედ მათი ვალდებულებაა”, - წერია განცხადებაში.
შეგახსენებთ, რომ ტელეკომპანია მაესტროს გაკოტრების საქმის წარმოებას აპროტესტებს გიორგი გაჩეჩილაძე. მისი ადვოკატის თქმით, მფოლობელმა პარტნიორებმა გადახდის-უუნარობის საქმის წარმოება ისე დაიწყეს სასამართლოში, რომ შეთავაზება, კომპანიის ფინანსური მდგომარეობის გაუმჯობესების შესახებ, არც განუხილავთ.
გაჩეჩილაძემ სასამართლოში ეს გადაწყევტილება გასააჩივრა. მან სარჩელი ლოგოს დაბრუნების შესახებაც შეიტანა.
"ჩვენ დღეს შევიტანეთ სარჩელი და ვითხოვთ მაესტროში ლოგოს დაბრუნებას. მოთხოვნილი გვაქვს მაესტროში აუდიტის ჩატარება. აუდიტმა უნდა დაადგინოს, როგორ არის აღრიცხული გიორგი და ლევან გაჩეჩილაძეების მიერ მიტანილი 2 მილიონი აშშ დოლარის ოდენობის თანხა მაესტროში. ხომ არ არის ის გოგელიას ვალში აღრიცხული. ასევე უნდა დაადგინოს გოგელიას მიერ ინვესტირებული თანხები მაესტროში მხოლოდ მისია თუ მის უკან სხვა სპონსორების თანხებიცაა," - განაცხადა გიორგი გაჩეჩილაძის ადვოკატმა ირაკლი კორძაიამ.
