დედაქალაქის მუნიციპალიტეტის საკრებულოს თავმჯდომარის პირველი მოადგილე გიორგი ტყემალაძე ოფიციალური ვიზიტით სტრასბურგში გაემგზავრა, სადაც ევროპის საბჭოს ადგილობრივი და რეგიონული ხელისუფლებების კონგრესის პლენარულ სესიას ესწრება.
კონგრესზე, რომელიც სტრასბურგში 19-24 ოქტომბერს იმართება, ადგილობრივი ხელისუფლების როლსა და ადამიანის უფლებების დაცვასთან დაკავშირებით, მიგრაციასა და დისკრიმინაციაზე, ასევე ბავშვების უფლებებისა დაცვასა და ქალების სიღარიბის წინააღმდეგ ბრძოლის პრობლემებზე იმსჯელებენ.
გიორგი ტყემალაძის ინფორმაციით, ადგილობრივი თვითმმართველობის განვითარების კუთხით, განსაკუთრებით მნიშვნელოვანი გადაწყვეტილების მიღების პროცესში მოქლაქეთა აქტიურ ჩართულობაა.
რადიკალიზმთან და სიძულვილთან ბრძოლის კუთხით კონგრესზე წარმოდგენილი იქნება სამოქმედო გეგმები, განხილული იქნება ადგილობრივი და რეგიონალური ხელისუფლების საზოგადოებასთან თანამშრომლობისა და მართვის პროცესებში საზოგადოებისა და ახალგაზრდობის ჩართულობის პერსპექტივები.
ევროპის საბჭოს ადგილობრივი და რეგიონული ხელისუფლებების კონგრესის გენერალური მდივნის, ანდრეას კიფერის თქმით, კონგრესის მაღალი რანგის წარმომადგენლები, მათ შორის ევროპის საბჭოს ადგილობრივი და რეგიონული ხელისუფლებების კონგრესის პრეზიდენტი ჟან კლოდ ფრეკონი, საქართველოს ნოემბერში ეწვევიან და შეხვედრებს მთავრობის წარმომადგენლებთან გამართავენ.