ოპოზიციონერი დეპუტატი კობა სუბელიანი სასკოლო ასაკის ხუთ წლამდე შემცირებას ისევ ითხოვს. სუბელიანმა „ზოგადი განათლების შესახებ“ კანონში ცვლილებები მეორედ მოამზადა, რომლის ინიცირებაც ბიუროს დღევანდელ სხდომაზე მოხდა.
ცვლილებებით, საჭიროების შემთხვევაში, მშობელი უზრუნველყოფილი იქნება ზოგადი განათლების დაწყებით საფეხურზე სწავლის დაწყების უფლებით ბავშვის 5 წლის ასაკიდან.
დღეს მოქმედი კანონით, განათლების დაწყებით საფეხურზე სწავლის დაწყების ასაკი 6 წელია. ასევე, სწავლის დაწყების უფლება აქვთ იმ პირებს, რომელთაც 6 წელი მომდევნო სასწავლო წლის პირველ იანვრამდე უსრულდებათ.
შეგახსენებთ, რომ კობა სუბელიანმა აღნიშნულ კანონში ცვლილებები საგაზაფხულო სესიაზეც მოამზადა, თუმცა, უმრავლესობამ ხანგძლივი მჯელობის შემდეგ, კანონპროექტი ჩააგდო. უმრავლესობის ნაწილი ცვლილებების არსს იზიარებდა, მეორე ნაწილი კი მიიჩნევდა, რომ 5 წლის ბავშვი სკოლისთვის მოუმზადებელი იქნება.