,,ნაციონალური მოძრაობის” ქუთაისის რეგიონულ ოფისზე თავდასხმისთვის ,,ქართული ოცნების” ახალგაზრდული ორგანიზაციის თავმჯდომარე ოთარ ლორთქიფანიძე დააკავეს. პოლიცია მას ადმინისტრაციულ სამართალდარღვევას - თვითმმართველი ერთეულის იერსახის დამახინჯებას ედავება.
ქართული ოცნების ორგანიზებით, ერთიანი ნაციონალური მოძრაობის ქუთაისის ოფისთან აქცია მოეწყო. მათ შენობას კვერცხები და ცოცხები დაუშინეს. ისინი ნაციონალური მოძრაობის ლიკვიდაციას მოითხოვდნენ. აქციის მონაწილეებმა ოფისში შეჭრა რამდენჯერმე სცადეს, ერთხელ ეს მოახერხეს კიდეც. ისინი ენმ-ის წევრებს სიტყვიერად დაუპირისპირდნენ.
ერთიანი ნაციონალური მოძრაობის ინფორმაციით, ქუთაისის გარდა, მათი რეგიონული ოფისები დაარბიეს გორში, ბათუმსა და ოზურგეთში.
