საქართველოს მოსახლეობის უმეტესობა ავტოტრანსპორტის ტექნიკური დათვალიერების მომხრეა, - ამის შესახებ ნათქვამია ეროვნულ დემოკრატიული ინსტიტუტის მიერ გამოქვეყნებულ კვლევაში.
გამოქვეყნებული კვლევის მიხედვით, კვლევაში მონაწილე რესპოდენტების 68% მიიჩნევს, რომ ტექნიკური დათვალიერება აუცილებელია. ამავე მოსაზრებას ემხრობა 66% მათგან, ვისაც ავტომობილი ჰყავს.
რესპოდენტების 25% აცხადებს, რომ ტექნიკური დათვალიერება აუცილებელი არ არის, ხოლო გამოკითხვაში მონაწილეთა 6%-მა უარი განაცხადა კითხვაზე პასუხის გაცემისგან.
NDI-ის კვლევის საველე სამუშაოები 8 აგვისტო-10 სექტემბრის პერიოდში ჩატარდა. საქართველოს მასშტაბით, გამოიკითხა 4,448 ადამიანი. NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC–საქართველო.
