შერიგებისა და სამოქალაქო საკითხებში სახელმწიფო მინისტრის მოადგილის, ქეთევან ციხელაშვილის ინფორმაციით, მიმდინარე წელს, სახელმწიფოს დაგეგმილი აქვს, რომ გამყოფი ხაზების მიმდებარე სოფლების გაზიფიცირება დაასრულოს.
როგორც ჟურნალისტებს ციხელაშვილმა განუცხადა, გაზიფიცირების მიზნით, გამყოფი ხაზების სიახლოვეს მცხოვრები მოსახლეობისთვის, მუშაობა ინტენსიურად მიმდინარეობს.
მისი ცნობით, წინა წლებში, 11 400-მდე ოჯახს შეშისთვის 200 ლარიანი ვაუჩერის დახმარება მიეცა, რადგან ეს სოფლები გაზიფიცირებული არ იყო და ისინი 2008 წლიდან მოყოლებული უყურადღებოდ იყო მიტოვებული.
„სახელწმიფოს დაგეგმილი აქვს, რომ გაზიფიცირება დაასრულოს და ყველა სოფლის მოსახლეობას გაზი სახლში შეუყვანოს, რაც უპრეცედენტოა. ვფიქრობ, რომ ამ ოჯახებისთვის ძალიან შეღავათი იქნება და მთავრობა იმ შესაძლებლობასაც განიხილავს, თუკი ეს სადმე ვერ მოესწრება, ამ მოსახლეობას ალტერნატიულად დაეხმაროს. ამ ეტაპზე 36 სოფელში გაზიფიცირება დასრულებულია. გეგმაში გვაქვს, რომ გამყოფი ხაზის სოფლებში, ზამთარს გაზიფიცირებული უნდა შევხვდეთ“, - დასძინა მინისტრის მოადგილემ.
