დევნილთა და განსახლების მინისტრის, სოზარ სუბარის ინფორმაციით, 858 პირს დევნილის სტატუსი ჩამოერთვა, რადგან მათ სტატუსი უკანონოდ ჰქონდათ მიღებული.
სოზარ სუბარი მისი უწყების საქმიანობის შესახებ ანგარიშს ამ წუთებში პარლამენტის ადამიანის უფლებათა დაცვის კომიტეტის სხდომაზე წარადგენს.
მინისტრის ცნობით, სამინისტროში გახსნილია მისაღები ცენტრი, სადაც შესაძლებელია ადამიანების კომფორტული მომსახურება და უწყება დღეში 600 ადამიანს ემსახურება.
მისი ინფორმაციით, მიმდინარე წელს, სამინისტროს ცხელ ხაზზე 200 ათასზე მეტი ზარი შევიდა.
სუბარის განცხადებით, დევნილთა რეგისტრაცია მოხდა და მათი რაოდენობა 267 832 არის, თუმცა, ეს ციფრი 260 ათასამდე ჩამოვიდა, მაგრამ ეს რიცხვი უცხოეთიდან ჩამოსული პირების პროპორციულად ნელ-ნელა იზრდება.
„858 პირს დევნილის სტატუსი ჩამოერთვა, რადგან მათ სტატუსი უკანონოდ ჰქონდათ მიღებული და ეს საქმეები შესაწავლად პროკურატურაშია გადაგზავნილი. საუბარია იმ პირებზე, რომელთაც სახელმწიფოსგან ფულადი კომპენსაცია და ბინა აქვთ მიღებული. ამნისტია იმ ნაწილზე ვრცელდება, როცა არის საბუთის გაყალბება და არა სახლის უკანონოდ მიღება“, - განაცხადა სუბარმა.
მინისტრი ირწმუნება, რომ არცერთი შემთხვევა არ ყოფილა ისეთი, როცა დევნილი საკუთარი ფართიდან გამოასახლეს.
