საქართველოში პენსიის ზრდის საკითხი ჯანდაცვის კომიტეტის თავმჯდომარე დიმიტრი ხუნდაძესა და ოპოზიციონერ დეპუტატ გიგი წერეთელს შორის დაპირისპირების მიზეზი გახდა.
როგორც ჯანდაცვის კომიტეტის სხდომაზე, 2016 წლის სახელმწიფო ბიუჯეტის პროექტის განხილვისას წერეთელმა განაცხადა, ქვეყანაში პენსია უნდა გაიზარდოს.
წერეთელის შეფასებით, ვინაიდან, პენსიის 150 ლარამდე ზრდა „ნაციონალური მოძრაობის“ მმართველობის დროს იყო დაგეგმილი, ახალ ხელისუფლებას პენსიის 10 ლარით გაზრდა წარმატებად ვერ ჩაეთვლება.
სხდომაზე ოპოზიციონერ დეპუტატს ჯანდაცვის კომიტეტის თავმჯდომარე გამოეხმაურა და მან წერეთელს ბრალი ტყუილის თქმაში დასდო.
„ბატონო გიგი, „ნაციონალური მოძრაობის“ ბევრ წევრს ტყუილის თქმა უხდება, თქვენ კი, არ გიხდებათ“, - მიმართა წერეთელს ხუნდაძემ.
თავის მხრივ, წერეთელმა ტყუილის თქმაში ხუნდაძე დაანაშაუალა.
„რა მიხდება და რა - არა, ეს თქვენთვის არ მიკითხავს! თქვენთვის არც ის მითქვამს, თქვენ რა გიხდებათ და რა - არა. ბატონო დიმიტრი, ტყუილი ის არის, რასაც თქვენ ამბობთ“, - მიმართა წერეთელმა ხუნდაძეს.
საქართველოში პენსიის ზრდის საკითხზე მთავრობასა და პარლამენტს შორის კონსულტაციები გაიმართება.