მთავრობის ადმინისტრაციაში ტექნოლოგიური ინსტიტუტის დაფუძნების თემაზე შეხვედრას მოქმედ პრემიერ-მინისტრთან ერთად ყოფილი პრემიერი ბიძინა ივანიშვილიც ესწრება. მთავრობა და საქველმოქმედო ფონდი "ქართუ", ტექნოლოგიური ინსტიტუტისა და თანამედროვე ტექნოლოგიების განვითარების სამეცნიერო-საგანმანათლებლო ცენტრის დაფუძნების სფეროში, მსოფლიო დონის სამეცნიერო ინსტიტუტებთან თანამშრომლობას გეგმავენ.
როგორც ჟურნალისტებს მთავრობის ადმინისტრაციაში განუცხადეს, ორგანიზაციები, რომლებთანაც საქართველოს აღმასრულებელი ხელისუფლება და საქველმოქმედო ფონდი "ქართუ", ტექნოლოგიური ინსტიტუტის და ადრონული თერაპიის მეგაპროექტის გარშემო თანამედროვე ტექნოლოგიების განვითარების სამეცნიერო-საგანმანათლებლო ცენტრის დაფუძნებისა და განვითარების სფეროში ითანამშრომლებენ, ბირთვული კვლევების ევროპული ორგანიზაცია (CERN), იტალიის ონკოლოგიური ადრონული თერაპიის ეროვნული ცენტრი (CNAO) და იტალიის ბირთვული ფიზიკის ეროვნული ინსტიტუტი (INFN) არიან.
,,ბირთვული კვლევების ევროპული ორგანიზაციის CERN-ის სამეცნიერო დირექტორი სერჯიო ბერტოლუჩი, CERN-ის საერთაშორისო ურთიერთობების ოფისის მრჩეველი ქრისტოფ შეფერი, იტალიის ონკოლოგიური ადრონული თერაპიის ეროვნული ცენტრის გენერალური მენეჯერი სანდრო როსი და ბირთვული ფიზიკის ეროვნული ინსტიტუტის პრეზიდენტი ფერნანდო ფერონი საქართველოში სპეციალურად ამ მიზნით ჩამოვიდნენ. CERN, CNAO, INFN ქართულ მხარეს ექპერიმენტული კვლევითი ბაზის მშენებლობისა და ფუნქციონირების საქმეში მიღებულ გამოცდილებასა და ცოდნას გაუზიარებენ; აღნიშნული ორგანიზაციები ქართულ მხარეს გადასცემენ ტექნოლოგიური ინსტიტუტის სამეცნიერო-ტექნიკური ბაზის საპროექტო დოკუმენტაციას, ასევე გამოყოფენ სათანადო გამოცდილების მქონე ექსპერტებს, რათა ტექნოლოგიურმა ინსტიტუტმა ფუნქციონირება ეფექტურად დაიწყოს. მხარეები ითანამშრომლებენ სტუდენტების და მკვლევარების მომზადების, ერთობლივი პროგრამებისა და პროექტების შემუშავებაში",- განმარტავენ მთავრობის ადმინისტრაციაში.